Niadtong Enero 19, 2021, gibasura sa Kamchatka Territory Court ang apelasyon ni Brader Sergey Ledenyov. Ipatuman na karon ang iyang orihinal nga duha ka tuig nga suspended prison sentence. Dili siya mapriso niining higayona.

Sa wala pa ipakanaog ang desisyon bahin sa apelasyon, si Sergey gihatagan ug kahigayonan nga mosulti sa korte. Maisogon niyang gidepensahan ang iyang pagtuo ug miingon nga determinado siyang simbahon si Jehova. Siya miingon: “Ang akong pagtuo wala ibase sa mga lagda sa bisan unsang organisasyon. Gibase kini sa Bibliya. Pananglitan, ‘ang matag balay dunay nagtukod, apan ang nagtukod sa tanang butang mao ang Diyos,’ ug nga ‘Jehova ang iyang ngalan.’ (Hebreohanon 3:4; Exodo 15:3) Walay sentensiya nga makapapas nianang mga pulonga sa Bibliya o sa akong kasingkasing.”