Niadtong Agosto 13, 2019, gimando sa appeal court sa siyudad sa Kirov nga i-release ang 26 anyos nga si Brader Andrey Suvorkov sa pagkapriso sa balay. Bisag gihatagan na si Brader Suvorkov ug dugang kagawasan, nagpadayon gihapon ang kriminal nga kaso batok niya.

Sumala sa miaging report, si Brader Suvorkov, uban sa iyang amaama ug tulo pa ka brader, giaresto dihang gi-raid sa lokal nga mga polis ug naka-mask nga mga sundalo ang 19 ka balay sa Kirov niadtong Oktubre 9, 2018.

Nahinumdom si Brader Suvorkov dihang gi-raid ang iyang balay: “Daghan sa importante namong mga butang ang ilang gikuha. Pero wala ra mi maguol sa akong asawa, kay naningkamot ming magkinabuhing simple ug wala maghatag ug sobrang pagtagad sa materyal nga mga butang. Ang tambag sa Mateo 6:21, nga ‘kon asa ang imong bahandi, atua usab ang imong kasingkasing,’ nakatabang namo nga magpabiling kalmado.”

Human sa pag-raid, gikasohan ug kriminal nga mga kaso si Brader Suvorkov, iyang amaama, ug ang tulo pa ka brader tungod sa pagkantag mga Kingdom song, pagtuon ug relihiyosong mga literatura, ug pagbatog kopya sa Russian nga Bag-ong Kalibotang Hubad sa Balaang Kasulatan. Gibutang sila sa temporaryong prisohan samtang naghulat sa desisyon sa korte kon buhian ba sila o ibutang sa pretrial detention.

Si Brader Suvorkov miasoy sa iyang eksperyensiya: “Duha ka gabii ko sa temporaryong prisohan. Sa sugod pa lang, nagsige na kog ampo. Segurado kong naminaw si Jehova nako ug tabangan ko niya. Naghinumdom kog mga Kingdom song ug gikanta nako ni. Sa ulahi, kapin sa 50 ka awit ang akong nahinumdoman ug gikanta.”

Ang korte midesisyon nga ibutang si Brader Suvorkov ug ang uban sa pretrial detention. Sa iyang unang semana sa prisohan, nagpokus si Brader Suvorkov sa pagtabang sa uban. Siya nahinumdom: “Naghisgot kog ngalan sa mga igsoon sa akong mga pag-ampo ug nagpadalag makapadasig nga mga sulat sa mga adres nga akong mahinumdoman. Nakapalipay ni nako.”—Buhat 20:35.

Paglabay sa pipila ka bulan, ang tanang brader didto na gipriso sa ilang mga balay, gawas kang Brader Andrzej Oniszczuk. Sa mga brader nga gikan sa Kirov, si Brader Suvorkov ang unang gi-release sa pagkapriso sa balay.

“Dihang maghinumdom ko sa nahitabo,” miingon si Brader Suvorkov, “Nalipay gyod ko nga nakasulay kong mapriso. . . . Wala ko mahibalo kon unsay mahitabo sa umaabot o kon mapriso ba ko pag-usab. Pero masaligon ko nga tabangan ko ni Jehova ug sa iyang organisasyon, bisan pag naa ko sa prisohan. Dili na ko mahadlok nga mapriso.”