Ang mga opisyales sa Europe ug United States padayong nagkondenar sa ginahimong paglutos sa Russia batok sa mga Saksi ni Jehova.

Sa usa ka pahayag niadtong Oktubre 27, 2020, si Chair Gayle Manchin miingon: “Ang USCIRF natugaw sa gihimo sa Russia batok kang Dennis Christensen. Klaro kaayo nga ang gobyerno nagdumot niining inosenteng tawo nga napriso tungod sa iyang malinawong pagpakigbahin sa relihiyosong kalihokan. Imbes maluoy niya, ang gobyerno nag-isip kaniya ingong peligrosong kriminal. Kini maoy klaro kaayong inhustisya.”

Gisuportahan ni Chair Manchin si Brader Christensen pinaagi sa Religious Prisoners of Conscience Project sa USCIRF. Balikbalik nga gikondenar sa USCIRF ang unom ka tuig nga sentensiya sa pagkapriso ni Brader Christensen.

Gikondenar sab sa USCIRF ang Russia tungod sa dili pagtugot nga buhiag sayo si Brader Christensen. Ang USCIRF nag-ingon nga siya “gihatagag parole niadtong Hunyo 23, [2020,] pero kini nga desisyon gikuwestiyon dayon sa usa ka prosecutor. Imbes buhian, si Christensen gibutang sa piot ug igang nga selda tungod sa paglapas kuno sa mga balaod sa prisohan.”

Gitapos sa USCIRF ang ilang pahayag pinaagi sa paghisgot sa ilang 2020 Annual Report. Ang report nagkondenar sa gobyerno sa Russia “tungod sa ilang sistematiko, dili makataronganon, ug padayong paglapas sa kagawasan sa pagsimba” ug nagrekomendar nga silotan sa gobyerno sa U.S. ang Russia pinaagi sa pag-isip niini ingong “nasod nga angayng bantayan.”

Sa susama, walo ka taas ug ranggo nga mga opisyales nga gipili sa United Nations Human Rights Council ang misulat sa Permanent Mission of the Russian Federation to the United Nations Office. Niana nga sulat, ang mga opisyales miingon nga sila nadismaya tungod “sa padayong paglutos sa mga Saksi ni Jehova didto sa Russian Federation, sa pag-ilog sa Administrative Center of Jehovah’s Witnesses sa St. Petersburg, ug sa pagdili sa relihiyosong mga kalihokan sa tanan nilang 395 ka lokal nga organisasyon sa nasod.” Gisaway sab sa mga opisyales ang pagbalewala sa Russia sa balikbalik nga hangyo sa daghang tawo gikan sa lainlaing nasod nga hunongon na ang paglutos.

Ang mga opisyales sa UN miingon nga gigamit sa Russia ang ilang dili tin-aw nga mga balaod bahin sa extremism “sa pagpahunong sa relihiyosong mga kalihokan sa mga Saksi ni Jehova, sa pagpanghadlok kanila, sa paglapas sa ilang pribasiya pinaagi sa pag-raid sa mga polis sa ilang mga balay, sa pagdakop sa uban kanila aron sukitsukiton, ug sa ubang kahimtang sa paghukom kanila nga sad-an ug sa pagpriso kanila.”

Ang mga opisyales miingon nga ang “katungod sa mga Saksi ni Jehova sa paghimo sa ilang relihiyosong mga kalihokan giproteksiyonan sa article 18 (1) sa ICCPR.” * Busa, sila naghangyo sa Russian Federation nga “paneguroon nga ang 2002 Federal Law on Combating Extremist Activity dili maglapas sa katungod sa mga tawo bahin sa ilang kagawasan sa hunahuna, konsensiya, relihiyon o tinuohan.”

Ang sulat nagyagyag sab bahin sa ubang grabeng pagmaltratar batok sa atong mga igsoon. Pananglitan, naghisgot ni bahin sa lima ka Saksi gikan sa Saratov nga gipangkulata niadtong Pebrero 6, 2020. Ang sulat nagpatin-aw: “Ang mga napriso nga mga Saksi ni Jehova sagad nagsagubang ug dili maayong kahimtang sa prisohan, dili maayong pagtratar, ug ubang pisikal ug psychological nga mga pagpaantos nga samag pag-torture, tungod lang sa ilang pagtuo.”

Ang sulat sa mga opisyales naghisgot usab sa laing grabeng paglutos—ang pag-torture sa mga polis sa Russia kang Brader Vadim Kutsenko niadtong Pebrero 10, 2020. Ang mga awtoridad sa Russia wala moangkon nga ilang gi-torture si Brader Kutsenko. Pero wala motuo niini ang mga opisyales sa UN, ug “nabalaka sila sa paglutos nga nasinatian sa mga Saksi ni Jehova sa tibuok nasod kay giisip ingong krimen ang ilang malinawong kalihokan.”

Ang pagdili niadtong 2017 ug ang sunodsunod nga paglutos nagpalihok sa Council of Europe’s Committee of Ministers * sa pagsusi pag-ayo kon gisunod ba sa Russia ang duha ka desisyon sa European Court of Human Rights nga sad-an ang Russia sa paglapas sa katungod sa mga Saksi ni Jehova. * Busa, ang Committee nagpakanaog ug desisyon niadtong Oktubre 1, 2020, diin ilang gipahayag ang ilang “grabeng kabalaka bahin sa pagdili niadtong 2017 ug sa makapatugaw nga mga report gikan sa lainlaing tinubdan . . . nga, ingong resulta niini nga pagdili, ang mga Saksi ni Jehova padayong gidakop, gipasakaag kaso, ug gipriso tungod lang sa malinawon nilang pagpakigbahin sa ilang relihiyosong kalihokan.”

Aron malikayan nga mahitabo ni pag-usab, ang Committee nagrekomendar nga ang Russia angayng mangitag mga paagi nga ayohon ang ilang “presenteng balaod bahin sa anti-extremism nga maoy gihimong basehanan sa ilang pagdili ug sa sunodsunod nga pagpasakag kriminal nga kaso batok sa mga Saksi ni Jehova.” Dugang pa, angayng konsiderahon sa Russia ang “pagtangtang sa pagdili ug sa paghunong sa pagpasakag kriminal nga kaso batok sa mga Saksi ni Jehova tungod lang sa ilang malinawong paghimo sa ilang relihiyosong mga kalihokan.” Sa 2021, rebyohon sa Committee kon gisunod ba gyod ni sa Russia.

Sukad sa 2017, kapig 400 sa atong mga igsoon sa Russia ug Crimea ang giakusahan nga mga ekstremista kuno. Kapig 210 ka Saksi ang napriso diha sa kapig 70 ka siyudad sa Russia.

‘Kita nagatawag sa ngalan ni Jehova nga atong Diyos’ nga padayong tabangan ang atong mga igsoon nga makalahutay nga mapailobon.—Salmo 20:2, 7.