Niadtong Pebrero 6, 2020, sa Orenburg, Russia, gipusposag maayo sa mga guwardiya sa prisohan sa Penal Colony No. 1 ang lima nato ka igsoon, si Aleksey Budenchuk, Gennadiy German, Roman Gridasov, Feliks Makhammadiyev, ug Aleksey Miretskiy. Si Brader Makhammadiyev gidala sa ospital kay nabalian siyag gusok ug nadaot ang iyang baga ug kidney. Human pusposi, si Brader Budenchuk, German, Gridasov, ug Miretskiy gibutangbutangan mao nga sila gipriso. Apil sa gibutangbutang kanila mao ang pagpanigarilyo—buhat nga gidili sa mga Saksi ni Jehova.

Sa gibalita na sa miagi, niadtong Septiyembre 19, 2019, gihukmang sad-an ni Judge Dmitry Larin sa Leninsky District Court sa Saratov ang atong lima ka igsoon, kauban sa ikaunom nga brader nga si Brader Konstantin. Gisentensiyahan silag duha ngadto sa tulo ka tuig ug tunga nga pagkapriso. Niadtong Disyembre 20, 2019, gibasura sa Saratov Regional Court ang ilang apelasyon. Pipila ka semana ang milabay, ang unom ka brader gipriso. Si Brader Bazhenov gidala sa Penal Colony No. 3 sa Ulyanovsk Region, maong wala siya maapil sa mga gi-torture sa Penal Colony No. 1.

Pag-abot sa lima ka brader sa Penal Colony No. 1 niadtong Pebrero 6, 2020, sila gipamusposan. Wala sila eksamina sa mga doktor hangtod pagkasunod adlaw, dihang nadiskobrehan nila nga taas kaayo ang hilanat ni Brader Makhammadiyev, ug naay dugo ang iyang ihi. Diha lang mitawag ug ambulansiya ang mga nagdumala sa prisohan human nila pugsa si Brader Makhammadiyev nga mopirmag dokumento nga nag-ingong “nadakin-as [lang] siya sa kasilyas ug natumba.” Naospital si Brader Makhammadiyev ug gioperahan—gitaorag tubo ang iyang baga aron makuha ang tubig nga naa sa sulod niini. Gipakita pod sa mga test nga nagutman si Brader Makhammadiyev, kay gikompiskar sa mga nagdumala sa prisohan ang pagkaon nga iyang gikinahanglan para sa iyang celiac disease.

Naguol kaayo ta sa nahitabo sa atong mga igsoon sa Russia kay nag-antos sila sa inhustisya ug dili maayong pagtratar. Pero masaligon ta nga padayon silang tabangan ni Jehova aron makalahutay.​—Filipos 1:27, 28.