Siyam lang ka adlaw human nga si Dennis Christensen dili makataronganong gisentensiyahan sa korte sa Russia, labing menos pito ka mga Saksi ni Jehova ang gi-torture sa mga awtoridad sa Russia didto sa Surgut, siyudad sa kasadpang Siberia, pinaagig pagkoryente, pagputos sa ulo aron dili makaginhawa, ug pagkulata. Gi-torture sa mga opisyal ang atong mga igsoon aron motug-an sila sa lokasyon sa ilang mga tigom ug sa mga ngalan sa uban pang mga Saksi.

Kini nagsugod dihang gi-raid sa mga awtoridad sa Surgut ang mga balay sa atong mga igsoon sayo sa kabuntagon sa Pebrero 15, 2019. Human arestoha ang pipila ka mga Saksi ug gidala ngadto sa mga opisina sa Investigative Committee, gisukitsukit sa mga awtoridad ang atong mga igsoon, pero mibalibad sila sa paghatag ug mga detalye bahin sa ilang mga isigkamagsisimba. Dihang mibiya ang nag-inusarang abogado didto, ang mga biktima mireport kon unsay nahitabo: giputos ang ilang mga ulo ug bag ug giselyohan kini gamit ang tape, gigapos ang ilang mga kamot sa likod, ug gikulata sila. Sila gipanghuboan ug gibuboag daghang tubig, dayon gipangkoryentehan. Sila gi-torture pag-ayo sulod sa mga duha ka oras.

Labing menos tulo ka Saksi ang naa pa gihapon sa prisohan. Kadtong gipagawas nagpatambal sa mga doktor sa ilang mga bun-og ug misang-at ug mga reklamo sa mga nagadumalang ahensiya.

Dugang pa, human sa mga pagpang-raid, ang mga awtoridad sa Russia nagsang-at ug mga kasong kriminal batok sa 19 ka Saksi tungod sa ilang akusasyon sa “pagpakigbahin sa ekstremistang kalihokan” ug “pag-organisar ug ekstremistang organisasyon.”

Ang maong ngil-ad nga pag-abuso sa awtoridad maoy paglapas sa balaod ubos sa Russian Criminal Code. Dugang pa, ang Russian Federation kinahanglang mosunod sa mga balaod nga giestablisar sa daghang internasyonal nga mga organisasyon sa pagprotektar sa mga tawo gikan sa pag-torture. Busa, kita moapelar sa mga korte sa Russia ug sa mga internasyonal nga mga korte batok niini nga krimen.

Labaw sa tanan, kita nahibalo nga nakita ni Jehova ang paglutos nga nasinatian sa atong mga igsoon sa Russia ug siya molihok ingong ilang ‘magtatabang ug manluluwas.’—Salmo 70:5.