Niadtong Oktubre 9, 2024, si Brader Arsen Avanesov gibuhian gikan sa pagkapriso sa Russia. Sa husay sa iyang kaso, nahukman siyang sad-an ug gisentensiyahan ug unom ka tuig ug tunga nga pagkapriso niadtong Hulyo 29, 2021. Dayon, panahon sa pag-apelar, gipatas-an sa huwes ang iyang sentensiya ngadto sa pito ka tuig nga pagkapriso. Pero kay kapig duha ka tuig na man siyang naa sa pretrial detention sa wala pa siya mahukming sad-an, nakompleto na niya karon ang iyang sentensiya.

Ang papa ni Arsen, si Brader Vilen Avanesov, gihukmang sad-an sa samang kaso ug nakompleto na niya ang sentensiya nga unom ka tuig nga pagkapriso. Gibuhian siya niadtong Pebrero 9, 2024.

Nakapalig-on kang Arsen ang iyang determinasyon nga tumanon ang iyang panaad kang Jehova. Sa iyang pangataposang pamulong sa korte una siya gidala sa prisohan, siya miingon: “Nanaad ko kang Jehova nga magmaunongon ko kaniya. Gipahinungod nako ang akong kinabuhi kaniya, ug kinasingkasing to nakong gihimo. Dili gyod nako gustong pakyason ang akong panaad kaniya.” Miingon pod si Arsen nga ang lig-on kaayo nga pagtuo dili bastabasta mabungkag. Matod niya: “Ang akong pagtuo wala mohuyang; mas milig-on pa gani ni.”

Nalipay ta nga nakauban na pag-usab ni Arsen ang iyang pamilya, ug padayon natong iampo ang mga igsoon nga naa pa sa prisohan. Makapahupay ang pagkahibalo nga bisan pag kita ‘nag-antos tungod sa lainlaing pagsulay,’ ang atong pagtuo ug paglahutay moresultag dagayang panalangin.—1 Pedro 1:6, 7.