Niadtong Pebrero 10, 2021, gisalikway sa Kursk Regional Court ang hangyo ni Brader Dennis Christensen nga sayo siyang pagawson sa prisohan. Iyang gihangyo ang korte nga mohatag siyag multa imbes silbihan ang nahibiling panahon sa iyang sentensiya. Kapig usa ka tuig nang kuwalipikado si Dennis nga hatagan ug parole, pero ang iyang mga hangyo kanunayng gisalikway.

Niining bag-o pa, gisulatan ni Dennis ang iyang asawa nga si Irina. Iyang gipaambit ang usa sa paborito niyang mga teksto: “Busa dili ta mohunong sa pagbuhat ug maayo, kay sa takdang panahon kita moani kon dili ta maluya.” (Galacia 6:9) Siya miingon nga gantihan gyod sila ni Jehova kon sila magpadayon sa paghimog maayo, pagtabang sa uban, ug dili moundang. Miingon sab siya nga gusto niya nga iniggawas niya sa prisohan, mas lig-on ang iyang espirituwalidad kay sa niadtong gisentensiyahan siya.

Si Dennis napriso ug nabulag kang Irina sukad niadtong Mayo 2017—halos upat na ka tuig. Si Dennis ug Irina padayong nagsilbing mga panig-ingnan kanato samtang nagpakita silag pagsalig kang Jehova, kalinaw sa hunahuna, ug dili matarog nga determinasyon sa pagpabiling maunongon.—Filipos 1:14.