Niadtong Enero 19, 2021, gibasura sa Kemerovo Regional Court ang apelasyon ni Brader Sergey Britvin ug Vadim Levchuk. Ipatuman na karon ang ilang orihinal nga sentensiya nga upat ka tuig nga pagkapriso. Tungod sa panahon nga ilang gigugol sa pretrial detention ug house arrest, nakasilbi na silag kapig tulo ka tuig sa ilang katibuk-ang sentensiya. Ingong resulta, gibanabana nga pagawson sila sa prisohan human sa mga usa ka tuig. Determinado silang magpabiling matinumanon ug pahimuslan ug maayo ang ilang mga kahimtang.

Sa hinapos sa ilang orihinal nga husay, ang maong mga brader walay kahadlok nga misulti bahin sa ilang pagtuo kang Jehova ug kon sa unsang paagi sila nakabenepisyo sa pag-alagad kaniya.

Si Sergey miingon sa korte: “Unsay gidahom sa prosekusyon kanako? Nga akong isalikway ang akong pagtuo? Ang pagtuo nako kang Jehova mao mismo ang nakatabang nako nga mahimong mas maayong tawo ug mahimong maayong lungsoranon sa Russia. Mapasalamaton ko sa Diyos nga iya kong gitabangan nga mouswag ang [akong] kaminyoon ug mouswag ang [akong] kinabuhi. Salamat kang Jehova, akong nakaplagan ang tinuod nga katuyoan sa kinabuhi ug ang paglaom alang sa nindot nga kaugmaon. Ang labing bililhong butang nga akong nabatonan mao ang akong suod nga relasyon kang Jehova nga Diyos. Gipakabahandi nako ang akong panaghigalaay uban kaniya, bisag unsa pay ilang iakusar kanako.”

Si Vadim miingon: “Sa akong bahin, sukad sa akong pagkaaresto, nagpabilin kong kalmado kay si Jehova dapig nako ug ako dapig kang Jehova! Bisag unsa pay ipakanaog nga hukom, ang giingon sa Diyos mao ang importante para nako. Walay igsapayan kon asa nako ipadayon ang pag-ugmad sa mga hiyas nga makapalipay sa Diyos, sama sa gugma, kalipay, kalinaw, pagkabuotan, pagtuo, kalumo, ug pagpugong sa kaugalingon.”