Niadtong Septiyembre 2, 2019, si Brader Valeriy Moskalenko gisentensiyahan sa Zheleznodorozhniy District Court sa Khabarovsk, Russia ug duha ka tuig ug duha ka bulan nga community service ug laing unom ka bulan nga pagmonitor kaniya pag-ayo ingong kriminal. Dili na siya kinahanglang magpabilin pa sa prisohan.

Human gipahibalo ang desisyon sa korte, si Brader Moskalenko gibuhian sa prisohan. Tungod niini, nalipay pag-ayo ang iyang pamilya ug mga higala. Napriso siya sukad niadtong Agosto 2, 2018. Sa wala pa siya gidakop, nagtrabaho siya ingong assistant train conductor samtang nag-atiman sa iyang nasakit nga inahan. Kay gimonitor pag-ayo ang iyang mga lihok, dili siya makabiyahe sa gawas sa Khabarovsk ug kinahanglan siyang moreport sa mga polis kada bulan aron maseguro nila nga wala siyay gibuhat nga ilegal.

Sa closing statement ni Brader Moskalenko sa korte niadtong Agosto 30, siya miingon: “Dili gyod ko mobuhat ug bisan unsa nga supak sa kabubut-on sa Diyos nga klarong gihisgotan sa Bibliya. Ug bisag unsaon pa ko pagpresyur o pagsilot sa korte, bisag sentensiyahan pa kog kamatayon, dili gyod ko mobiya sa labing gamhanang Maglalalang sa uniberso, si Jehova nga Diyos.”

Si Yaroslav Sivulskiy, representante sa European Association of Jehovah’s Witnesses, miingon: “Bisag dili mi uyon sa desisyon sa korte nga sad-an si Valeriy, nalipay mi nga makauli na siya sa ilang balay.”

Gawas kang Brader Moskalenko, pito pa sa atong mga igsoon sa Khabarovsk Territory ang naghulat sa desisyon sa korte sa ilang kriminal nga mga kaso.

Mapasalamaton ta kang Jehova nga nagpabiling lig-on ang pagtuo ni Brader Moskalenko sa panahong gipriso siya. Kita nag-ampo nga si Jehova padayong maghatag ug kusog sa tanan natong igsoon nga nagsagubang ug paglutos tungod sa ilang pagtuo sa Bibliya.—Isaias 40:31.