Sumala sa gipahibalo niadtong Pebrero 6, 2019, si Dennis Christensen gisentensiyahan sa Zheleznodorozhniy District Court sa Oryol ug unom ka tuig nga pagkapriso tungod sa pagpakigbahin sa malinawong pagsimba. Ang maong desisyon giapelar na karon sa mas taas nga korte.

Ang balita bahin sa unom ka tuig nga sentensiya kang Christensen miani dayog reaksiyon sa lainlaing nasod. Ang internasyonal nga mga organisasyon sama sa Council of Europe, European Union, United States Commission on International Religious Freedom, Office of the United Nations High Commissioner for Human Rights, ug uban pa miingon nga dili makataronganon ug walay basehan ang pagpasakag kaso sa Russia kang Dennis Christensen.

Sa pahayag ni Michelle Bachelet, U.N. High Commissioner for Human Rights, siya miingon: “Ang bug-at nga sentensiya kang Christensen naghatag ug peligrosong pananglitan. Tungod niini, ang mga Saksi ni Jehova sa Russia trataron ingong kriminal tungod ilang relihiyosong tinuohan, bisan pag naa silay kagawasan sa pagsimba.” Iyang giawhag ang gobyerno sa Russia sa “pagrebisar sa Federal Law on Combating Extremist Activity aron maklaro ang dili tin-aw nga kahulogan niini sa ‘extremist activity,’ ug seguroon nga kini nagtumong lang sa mga buhat nga bayolente o may pagdumot.” Sa iyang konklusyon, si Ms. Bachelet mihangyo sa mga awtoridad nga “ibasura ang mga sumbong ug buhian ang tanang gipriso tungod sa ilang relihiyon o gituohan, sa pagsulti sa ilang opinyon, ug sa malinawong mga panagkatigom ug panag-ubanay, mga butang nga duna silay katungod.”

Duha ka adlaw human sentensiyahi si Brader Christensen, upat ka iladong eksperto sa Russian human rights ang nag-organisar ug press conference sa Moscow. Napuno ang venue, ug kapig 6,000 ang nagtan-aw sa usa ka oras nga live program niini sa Internet. Gidepensahan sa maong mga eksperto ang mga Saksi ni Jehova ingong malinawong katawhan, ug nga dili sila hulga sa komunidad.

Apil sa maong press conference ang asawa ni Brader Christensen nga si Irina; iyang abogado, si Mr. Anton Bogdanov; ug usa ka representante sa European Association of Jehovah’s Witnesses, si Yaroslav Sivulskiy. Sila mipahayag bahin sa dili makataronganong desisyon ug mitubag sa mga pangutana sa press.

Bisag halos duha ka tuig nang napriso si Brader Christensen, wala niya wad-a ang iyang kalipay ug determinasyon nga mosalig kang Jehova. Pipila ka adlaw una sa iyang sentensiya, siya miingon sa iyang kataposang pahayag sa korte: “Madayag ra gyod sa ulahi ang kamatuoran, ug mao pod nay mahitabo niini nga kaso.” Human niya basaha ang Pinadayag 21:3-5, siya masaligong mihinapos: “Kining mga pulonga . . . naghubit sa panahon dihang ihatag sa Diyos ang hustisya ug tinuod nga kagawasan para sa tanang katawhan. Ang kagawasan konektado kaayo sa hustisya. Seguroon sa Diyos nga matuman kining tanan.”

Kinahanglang hulaton ni Brader Christensen ang resulta sa apelasyon samtang naa siya sa Detention Facility No. 1 sa Oryol Region​—diin siya gipriso sa miaging 20 ka bulan.