Viktor Bachurin

• Natawo: 1962 (Pavlovsky Posad, Moscow Region)

• Mubong Impormasyon: Minyo ug dunay duha ka anak ug usa ka apo nga babaye. Nagsugod sa pagtuon ug Bibliya uban sa mga Saksi ni Jehova niadtong mga 1990 ug nabawtismohan niadtong 1992. Sa pagkakaron, siya ray Saksi sa ilang pamilya

Aleksandr Kostrov

• Natawo: 1961 (Sortavala, Republic of Karelia)

• Mubong Impormasyon: Nagtrabaho ingong piloto, gas ug electric welder, ug elektrisyan. Naminyo siya kang Larisa niadtong 1997. Duna silay duha ka anak. Karon siya retirado na ug ganahang mangisda. Nakita niya ang maayong epekto sa pagpadapat sa mga pagtulon-an sa Bibliya diha sa iyang kinabuhi ug kini nakadasig niya sa pagpabawtismo niadtong 2002

Artur Netreba

• Natawo: 1978 (Glodeni, Moldova)

• Mubong Impormasyon: Naminyo kang Svetlana niadtong 1995 ug duna silay usa ka anak nga babaye. Ang ilang pamilya namalhin sa Lipetsk aron mangitag trabaho. Nagtrabaho ingong sales manager. Nakombinsir nga ang pagpadapat sa mga prinsipyo sa Bibliya naghatag ug katuyoan sa iyang kinabuhi. Nabawtismohan niadtong 2000

Gi-raid sa mga awtoridad sa Lipetsk Region ang pito ka balay niadtong Disyembre 2, 2019. Si Brader Viktor Bachurin, Aleksandr Kostrov, ug Artur Netreba giaresto. Giakusahan sila sa Federal Security Service (FSB) nga nakahimog “bug-at nga mga krimen batok sa balaod” tungod sa ilang pagtambong sa mga tigom sa kongregasyon ug paghimo sa ubang kalihokan sa ilang pagsimba. Ang mga brader gibutang sa pretrial detention ug gidetener sulod sa 331 ka adlaw.

Namatikdan ni Aleksandr nga mas nasuod siya kang Jehova samtang siya gidetener: “Panahon sa mga pagsulay nga sama niini, imong maamgohan nga ang imong pangunang tinubdan sa tabang mao si Jehova.”

Bahin sa iyang determinadong himoon, si Artur miingon: “Determinado ko nga dili mawala ang akong kalipay ug pagkapositibo. Ginapahinumdoman nako ang akong kaugalingon nga temporaryo lang kining tanan ug hupayon ko sa akong Amahan. Bisan asa man ko, dunay mga kahigayonan sa pagpakigsulti bahin sa atong balaang Diyos nga si Jehova.”

Si Viktor miingon: “Gipamatud-an ni Jehova nga siya ang akong kinasuorang higala samtang nag-atubang niini nga lisod nga mga kahimtang. Kanunay nakong bation nga gihigugma ko ni Jehova.”

Mapasalamaton kaayo si Viktor sa tanang igsoon nga mitabang sa iyang dili Saksi nga asawa samtang siya gidetener. Si Victor miingon: “Natandog siya sa kaayo nga gipakita sa mga sister kaniya. Kombinsido ko nga nakita sa akong pamilya ang gugma taliwala sa katawhan ni Jehova ug kadto nagsilbing maayong pagpamatuod kanila.”

Nahibalo ta nga si Jehova padayong maghupay sa tanan natong igsoon sa Russia ug sa ubang kayutaan nga nakasinatig paglutos.—Isaias 51:12.