Niadtong Enero 25, 2021, gibasura sa Korte Suprema sa Kabardino-Balkarian Republic ang apelasyon sa prosekusyon sa orihinal nga desisyon niadtong Oktubre 7, 2020, nga dili sad-an si Brader Yuriy Zalipayev. Ang prosekusyon puwedeng moapelar niini nga desisyon. Pero ipatuman na karon ang desisyon nga dili sad-an ang atong igsoon. Nahigawas na karon si Yuriy sa tanang sumbong batok kaniya. Duna siyay katungod nga mangayog danyos tungod sa sayop nga akusasyon.

Si Yuriy nagsalig kang Jehova ug wala siya mahadlok diha sa korte bisan pag nahibalo siya nga puwedeng mabali ang desisyon nga dili siya sad-an. Sa wala pa ipakanaog ang desisyon, walay kahadlok nga misulti si Yuriy sa korte kon sa unsang paagi taposon sa Diyos sa dili madugay ang tanang pagkadaotan, apil ang paglutos sa mga Saksi ni Jehova sa Russia. Siya miingon: “Bisag unsa pa ka organisado ang ilang mga pag-atake, dunay angayng masabtan ang mga maglulutos. Dili sila molampos sa ilang mga paningkamot nga bungkagon ang akong pagtuo sa mga saad sa Diyos nga hapit nang taposon ang pagkadaotan sa yuta. Dako ang akong pagtuo sa saad nga sa dili na madugay, ang tanang tawo nga lainlain ug nasyonalidad makaamgo na gyod nga silang tanan managsoon. Walay bisan unsa nga makapabahinbahin nila. Ang Bibliya nag-ingon bahin sa Diyos: ‘Siya magpakanaog ug hukom taliwala sa kanasoran ug magtul-id sa mga butang labot sa daghang katawhan. Ilang salsalon ang ilang mga espada ug himoong mga punta sa daro ug ang ilang mga bangkaw himoong mga galab. Ang nasod dili mobakyaw ug espada batok sa laing nasod, ug sila dili na magkat-on sa pagpakiggubat.’—Isaias 2:4.

“Kombinsido ko nga kini nga saad hapit na gyong matuman!”