Ang Moscow City Court nag-eskedyul ug appeal hearing diin pamatud-an mga Saksi ni Jehova nga supak sa balaod ang pasidaan nga gihatag batok sa ilang Administrative Center. Sa Enero 16, 2017, sa 11:10 a.m., Moscow Standard Time, paminawon sa korte ang apelasyon ug lagmit hukman dayon nila kini nianang adlawa gihapon.

Gustong pamatud-an sa mga Saksi nga ang mga akusasyong “extremist activity” gibase sa hinimohimo nga ebidensiya ug bakak nga mga testimonya nga minaomao ra sa lokal nga mga awtoridad aron ipakita nga ang sinserong pagsimba maoy kriminal nga kalihokan. Sa husay sa korte niadtong Oktubre 12, 2016, si Judge M. S. Moskalenko sa Tverskoy District Court sa Moscow wala motugot nga dunay motestigo o ipasalida ang video nga nagpakita sa ilegal nga binuhatan sa pipila ka awtoridad.

Matod pa sa international human rights lawyer nga si James Andrik: “Importante kaayo ang desisyon sa korte. Kon i-dismiss sa Moscow City Court ang apelasyon, himoon gyod sa Prosecutor General’s Office ang hulga niini batok sa Administrative Center. Mahimo niining ipa-liquidate ang Administrative Center ug hasion pag dugang ang relihiyosong komunidad sa mga Saksi ni Jehova ug idili ang ilang pagsimba sa tibuok Russia. Sa laing bahin, kon paboran sa korte ang apelasyon, dako kining kadaogan sa hustisya.”