Sa pagsugod, ang mga Saksi ni Jehova nakapahimulos ug malinawong pagsimba sa Russia human sila mahatagig national registration sa Russian Federation niadtong 1992. Narehistro pag-usab ang mga Saksi niadtong 1999 ubos sa Law on Freedom of Conscience and Religious Associations. Dunay ginatos ka lokal nga relihiyosong mga organisasyon sa mga Saksi ni Jehova nga narehistro ug naglihok sa tibuok nasod.

Apan, ang mga Saksi ni Jehova nakaatubang ug nagkadakong mga problema nga nagpameligro sa ilang relihiyosong kagawasan. Sukad sa 2009, ang mga law-enforcement agency naghimog tibuok nasod nga kampanya batok sa mga Saksi pinaagi sa sayop nga pagpadapat sa Law on Counteracting Extremist Activity. Gipahayag sa mga korte sa Russia ang daghang publikasyon sa mga Saksi ni Jehova—lakip ang opisyal nga website sa mga Saksi, ang jw.org—nga extremist. Girekisa sa mga polis ang ginatos ka balay ug mga dapit sa pagsimba. Gisumbong sa mga prosecutor ang mga Saksi ug administrative ug criminal nga mga kaso tungod sa pagtambong o pagdumalag relihiyosong mga tigom.

Bisag gibadlong sila sa European Court of Human Rights ug sa uban pang internasyonal nga mga awtoridad, wala kaayoy gihimo ang mga awtoridad sa Russia aron mapahunong ang pagpanghasi ug pagpihig batok sa mga Saksi ni Jehova. Anam-anam hinuon nga gipangusgan sa mga law-enforcement officials ang ilang paningkamot sa pagpugong sa kalihokan sa mga Saksi ni Jehova.