Sa Enero 16, 2017, ang mga Saksi ni Jehova sa Russia mosulay pag-usab pag-alkontra sa napulo ka tuig nang pagpit-os sa ilang relihiyosong kagawasan. Hangyoon nila ang Moscow City Court nga modesisyon batok sa pasidaan o warning nga gipadala ngadto sa ilang national headquarters nga ang maong warning maoy supak sa balaod ug walay pasikaranan. Ang warning, nga giisyu niadtong Marso 2, 2016, sa Deputy Prosecutor General nga si V. Ya. Grin, naghulga nga pasirad-an ang national headquarters sa mga Saksi kon may bag-ong ebidensiya labot sa “extremism” nga makaplagan sulod sa usa ka tuig.

Ang mga prosecutor sa Russia sayop nga nagpadapat sa Federal Law on Counteracting Extremist Activity ingong basehanan sa mga sumbong labot sa “extremism” batok sa mga Saksi ni Jehova. Human gibag-o ang balaod niadtong 2006, ang kahulogan sa extremism nagpakita nga wala nay himoong mga hangyo sa korte batok sa bayolenteng mga kalihokan, kondili kadto na lang ‘makapahinabo ug relihiyosong pagkabahinbahin.’ Kining halos wala nay restriksiyon nga kahulogan daw naghatag ug lisensiya sa mga awtoridad sa pagtuo nga ang bisan unsa nga sukwahi sa naandang relihiyosong pagtulon-an o nagpasiugdag laing pagtulon-an isipong makapahinabo ug relihiyosong pagkabahinbahin. Si Gregory Allen, abogado nga nagtabang para sa relihiyosong kagawasan sa mga Saksi sa Russia, miingon: “Ang mga awtoridad sa Russia naggamit niining daghag posibleng kahulogan nga “definition” aron isipong ‘extremist’ ang bisan unsang relihiyosong pagtulon-an nga gihunahuna nilang sukwahi sa naandang relihiyosong pagtulon-an.”

Ang imbestigasyon labot sa “extremism” diha sa pipila ka gagmayng relihiyon gisugdan pinaagig sulat nga may petsang Enero 2007 gikan sa Deputy Prosecutor General sa Russian Federation nga si V. Ya. Grin ngadto sa tanang prosecutors’ offices sa nasod. Tungod sa maong sulat nga kinahanglang mohimog imbestigasyon, gihimo ang kapig 100 ka inspeksiyon batok sa relihiyosong mga organisasyon sa mga Saksi ni Jehova sulod nianang tuiga.

Usa sa maong mga inspeksiyon nahitabo sa siyudad sa Taganrog, diha sa amihanan-sidlakang baybayon sa Sea of Azov. Kini nga inspeksiyon maoy gibasehan sa halos tanang sumbong nga extremism batok sa mga Saksi ni Jehova sa Russia. Sa Oktubre 2007, gitapos sa Rostov Regional Prosecutor’s Office ang ilang imbestigasyon ug miisyu ug pasidaan o warning batok sa Local Religious Organization (LRO) sa mga Saksi ni Jehova sa Taganrog ug pagkasunod tuig mihimo silag lakang nga pasirad-an ang LRO. Apan ang Prosecutor’s Office kulang ug ebidensiya aron pamatud-an ang pangangkon niini ug kini mihangyo sa Rostov Regional Court sa pagpakanaog ug sugo nga maghimog “expert study” aron susihon pag-ayo ang relihiyosong mga basahon sa mga Saksi ni Jehova.

Bisan pag mibabag ang mga Saksi, ang korte midesisyon sa paghimo sa maong “expert study” ug wala dawata ang hangyo sa mga Saksi nga mohimog independent research. Ang tanang eksperto sa korte mihinapos diha sa ilang report nga ang relihiyosong mga basahon sa mga Saksi dili makapahinabog agresibong mga buhat. Bisan pa niana, gisentro sa korte ang ilang pagtagad sa opinyon sa mga eksperto nga ang mga doktrina nga gitudlo diha sa mga basahon sa mga Saksi “posibleng makapamenos sa pagtahod” sa ubang relihiyon.

Pinaagi sa pagpalapad pa sa kahulogan sa pulong “extremism,” niadtong Septiyembre 11, 2009, midesisyon ang Rostov Regional Court nga “extremist” ang 34 ka publikasyon sa mga Saksi ug sa ngadtongadto giapil kini sa Federal List of Extremist Materials (FLEM). Midesisyon usab ang korte nga “extremist” ang Taganrog LRO ug gimandoan ang federal authorities sa pagpasira niini, idili ang kalihokan niini, iapil ang ngalan niini sa listahan sa extremist organizations, kompiskahon ang relihiyosong mga publikasyon niini, ug panag-iyahon sa Russian Federation ang propidad niini. Niadtong Disyembre 8, 2009, gisuportahan sa Supreme Court sa Russian Federation ang maong desisyon, busa kini final na. *

Pagsugod sa 2016, gihimo ang susamang mga mando sa korte nga nagpahayag sa 88 ka relihiyosong mga publikasyon ingong “extremist” ug nagpasira sa tulo ka LRO. May 18 pa ka LRO nga giimbestigahan. Dugang pa, ang federal authorities nagdili ug nag-block sa jw.org, ang opisyal nga website sa mga Saksi ni Jehova, nagbabag sa tanang relihiyosong publikasyon sa mga Saksi, ug nag-imbestigar sa Bibliya ingong “extremist” nga publikasyon.

Sa Marso 2016, gigamit sa Prosecutor General’s Office ang natigom nilang “ebidensiya” aron suportahan ang ilang warning batok sa national headquarters sa mga Saksi, nga nailhang Administrative Center of Jehovah’s Witnesses sa Russia, duol sa St. Petersburg. Gilangkit sa prosecutor ang Administrative Center ngadto sa gidili nga relihiyosong mga publikasyon ug ngadto sa mga LRO nga giimbestigahan pa o gisirad-an na, nga nag-ingon: “May padayong nadiskrobehan nga mga timailhan sa extremism diha sa kalihokan sa ubang bahin sa Administrative Center.”

Dihadiha human madawat ang warning, gihangyo sa mga Saksi ang Prosecutor General sa Russian Federation, si Yuriy Yakovlevich Chayka, nga kanselahon ang warning. Apan iya kining gipaboran ug miingon nga “ang mga argumento batok sa hinimohimo nga ebidensiya ug ubang pagpangabuso nga nahitabo panahon sa inspeksiyon nga gihimo sa mga law enforcement agencies dili basehanan sa pagkanselar sa warning, kay ang warning gibase sa mga desisyon sa korte.” Si Mr. Allen miingon: “Tingali nagtuo ang Prosecutor General nga ang korte sa Russia maka-legalize sa bakak nga mga ebidensiya nga gihimo sa dili matinud-anong mga opisyales sa balaod. Nakahinumdom ko nga sa Moscow, ang desisyon sa korte didto miresultag ilegal nga pagdili sa mga Saksi ni Jehova nianang siyudara, pero sa ulahi gideklarar sa European Court of Human Rights nga sayop kadto nga desisyon.” *

Human sa desisyon sa Prosecutor General, mireklamo ang mga Saksi didto sa Tverskoy District Court sa Moscow batok sa maong warning. Sa Oktubre 12, 2016, wala motugot si Judge M. S. Moskalenko nga may mga testigos o eksperto nga mopamatuod sa maong husay, ug iyang gi-dismiss ang apelasyon.

Kay napakyas kini nga mga paningkamot, gipatuman gihapon ang warning. Ang Administrative Center nameligrong masirad-an kon makombinsir sa Prosecutor General’s Office ang korte nga (1) ang mga LRO sa mga Saksi padayong naglapas sa extremism law, o (2) ang mga awtoridad makakaplag ug “bag-ong ebidensiya nga magpamatuod nga dunay timailhan sa extremism” sa kalihokan sa mga Saksi sulod sa usa ka tuig nga gihisgotan sa warning.

Sukad giisyu ang warning niadtong Marso 2, 2016, gipangusgan pa sa mga awtoridad sa Russia ang ilang mga paningkamot nga tinuyong mag-imbentog “bag-ong ebidensiya.” Dunay 35 ka dokumentadong mga situwasyon (may total nga kapig 60 sukad sa 2012) dihang ang mga awtoridad nag-imbentog “krimen” pinaagi sa pagbutang ug relihiyosong mga publikasyon nga wala na gamita sa mga Saksi ni Jehova. Ang “investigative searches” nga nakakita kunog “ebidensiya” sagad giubanan ug agresibong mga buhat sa kapolisan ug special police forces.

• Sa Hulyo 28, 2016, kaduha giatake ang mga Saksi ni Jehova sa Republic of Karelia. Sa Petrozavodsk, ang armado ug nagmaskarang mga lalaki sa Special Police Force nangabot sa Kingdom Hall ug gipahunong ang miting alang sa pagsimba. Ang mga polis nagbutang ug lima ka kopya sa librong Unsay Tinuod nga Gitudlo sa Bibliya? diha sa bilding ug sa ulahi “nakita” kini panahon sa pagrekisa. Ang maong mga opisyales wala gyod magpakita sa mga Saksi ug court order nga nag-awtorisar sa maong ronda ug pagrekisa sa mga bilding. Sa Kostomuksha, gipahunong sa mga opisyal sa Federal Security Service (FSB) ug sa Center for Counteracting Extremist Activity ang relihiyosong miting. Dihang girekisa ang Kingdom Hall, “nakakita” silag tulo ka publikasyon sa mga Saksi nga nalista sa FLEM.

• Sa Agosto 20, 2016, gipahunong sa mga law-enforcement officers ang miting sa mga Saksi ni Jehova sa siyudad sa Mayskiy, Republic of Kabardino-Balkaria. Human pugsa pagpagawas ang tanan sa Kingdom Hall, ang mga opisyal “nakakita” ug mga publikasyon nga nalista sa FLEM sulod sa bilding. Ang mga awtoridad walay gipakitang mga papeles o awtorisasyon sa maong ronda.

• Sa Septiyembre 20, 2016, sayo sa buntag nangabot ang armado ug nagmaskarang mga lalaki sa Special Police Force didto sa Kingdom Hall sa Nezlobnaya, Stavropol Territory. Aron makasulod sa bilding, ilang gitabas ang pultahan ug dayon namutang ug daghang publikasyon sa mga Saksi nga nalista sa FLEM. Misulod dayon ang mga opisyal ug ilang “nakita” kining mga publikasyona panahon sa ilang pagrekisa.

Ang pag-akusar sa mga Saksi ni Jehova sa sumbong nga extremism sagad susama rag pamaagi, sama sa nahitabo sa LRO sa mga Saksi sa siyudad sa Birobidzhan:

1. Paagi 1: Ang mga law-enforcement officers moadto sa tigomanan o simbahan sa mga Saksi ug mamutang ug relihiyosong mga publikasyon nga nalista sa FLEM.

   Mangabot ang mga polis ug FSB officers ug pahunongon ang tigom sa mga Saksi ni Jehova, ug moingon nga ilegal ang maong tigom, ug dayon mopahibalo nga mangita silag “extremist nga mga butang.”

2. Paagi 2: Rekisahon sa mga law-enforcement officers ang bilding ug “makakita” silag gidiling mga publikasyon.

   Ang mga opisyal “nakakita” ug 12 ka publikasyon nga gilista sa FLEM. Sa ulahi napamatud-an sa mga Saksi nga dunay wala mailhing tawo nga miadto sa bilding sa wala pa ang tigom ug dayon nagbutang sa “ebidensiya.”

3. Paagi 3: Pasakaag sumbong sa prosecutor ang LRO sa mga Saksi ni Jehova o ang chairman niini ug kasong administratibo agig paglapas sa pagpanagtag ug extremist materials ug dayon pamultahon.

   Mihukom ang district court nga ang chairman sa LRO sad-an sa kasong administratibo ug gipamultag 4,000 rubles ($66.88 U.S.).

4. Paagi 4: Ang prosecutor moisyu ug warning ngadto sa LRO nga dili na usbon ang maong paglapas sulod sa 12 ka bulan.

   Ang prosecutor moisyu ug warning nga gidili ang pag-apil sa “extremist nga kalihokan.”

5. Paagi 5: Dili madugay human niini, ang mga law-enforcement officers mobalik sa maong tigomanan, magbutang pag-usab ug mga publikasyon sa mga Saksi sulod sa bilding, ug dayon “makit-an” kini panahon sa pagrekisa.

   Pahunongon sa mga opisyales ang relihiyosong tigom aron rekisahon ang bilding kon duna bay “extremist nga mga butang.” Pero sa wala pay tigom, sa pagsusi sa mga Saksi sa bilding, duna silay nakita nga mga publikasyon nga gibutang o “planted” ug ila kining gilabay. Busa ang Oktubre 2015 nga paningkamot sa paghimohimog ebidensiya wala molampos. Sa Enero 21, 2016, mas andam na ang mga opisyales. Gipahunong pag-usab sa mga special police force, polis, ug mga opisyales sa FSB ang relihiyosong tigom sa mga Saksi ni Jehova ug mipahibalo nga ilang rekisahon ang bilding kon duna bay “extremist nga mga butang.” Usa sa mga Saksi ni Jehova nga mitambong nakakitag putos sa mga publikasyon nga gibitbit sa usa ka opisyal. May laing opisyal nga nagrekisa sa lugar nga human na rekisaha, apan niining higayona walay laing makapamatuod, ug dayon ilang “nakita” ang maong putos sa mga publikasyon.

6. Paagi 6: Base niining bag-ong ebidensiya batok sa extremist nga kalihokan, ang prosecutor’s office o ang Ministry of Justice mipasakag sumbong sa korte sa pagpasira sa LRO.

   Mihukom ang district court nga ang LRO chairman sad-an sa kasong administratibo ug gipamulta siyag 3,000 rubles ($50.16 U.S.). Sa Oktubre 3, 2016, ang regional court mihukom nga “may nakitang bag-ong mga ebidensiya nga nagpamatuod nga may mga timailhan sa kalihokan sa LRO” ug mihukom nga ang Birobidzhan LRO maoy “extremist,” gidili ang kalihokan niini, ug gipasirad-an kini.

Isip kataposang lakang sa proseso, gipaluyohan sa Russian Federation Supreme Court ang mga desisyon sa trial court nga pasirad-an ang mga LRO sa mga Saksi ingong “extremist nga mga organisasyon,” ug ning bag-o lang, ang Belgorod LRO, Stariy Oskol LRO, Elista LRO, ug Orel LRO. Miapelar ang mga Saksi agig depensa sa Birobidzhan LRO ug padayon pa kining gihusay sa Supreme Court.

Si Vasiliy Kalin, representante gikan sa Administrative Center, nakahinumdom sa panahon nga ang iyang pamilya gibalhin sa Siberia panahon sa Soviet nga pagmando isip mga biktima sa relihiyosong paglutos: “Sa nagdako ko, ang mga awtoridad mangadto sa kabalayan sa mga Saksi ug mangitag relihiyosong mga publikasyon. Apan wala sila makahunahunag pamutang ug mga publikasyon diha sa among mga balay ug unya ila kuno ning nakit-an. Kining bag-ong taktika sa law-enforcement authorities sa Russia maoy pamatuod nga wala silay makitang tinud-anayng basehanan sa pagpasakag sumbong nga supak sa balaod ang kalihokan sa mga Saksi ni Jehova.”

Sa Enero 16, 2017, husayon sa Moscow City Court ang apelasyon sa mga Saksi ni Jehova batok sa warning sa Prosecutor General ug unya mopakanaog dayon ug hukom. Modesisyon kaha ang korte nga walay basehanan ang akusasyon sa Prosecutor General’s Office batok sa Administrative Center sa mga Saksi ni Jehova nga kini nalangkit sa extremist nga kalihokan? Kanselahon kaha niini ang warning? Naghinaot ang mga Saksi ni Jehova ug ang uban pang nagpabili sa tawhanong katungod sa Russia ug sa tibuok kalibotan nga himoon nila kana.