ST. PETERSBURG, Russia—Sa Enero 22, 2014, ang mga Saksi ni Jehova nakadaog ug dakong kaso dihang giusab sa regional court ang desisyon sa district court nga idili sa Russia ang website nga jw.org.

Ang desisyon sa Tsentralniy District Court niadtong Agosto 7, 2013 giusab sa Tver Regional Court. Napamatud-an sa regional court nga sayop ang desisyon sa district court kay ang mga Saksi ni Jehova nga tag-iya sa website wala paapila sa husay. Ang prosikusyon nagpasang-at niini nga kaso kay ang jw.org dunay mga publikasyon nga gihukmang “extremist” sa mga korte sa Russia. Pagkahibalo sa mga Saksi ni Jehova sa desisyon sa district court, ila dayong gitangtang kini nga mga publikasyon sa jw.org sa Russia. Gikompirmar sa Tver Regional Court nga nagsunod ang mga Saksi sa mga balaod sa Russia ug busa dili kinahanglang idili ang website.

Sa laing bahin, ang mga Saksi dili uyon sa desisyon sa mga korte sa Russia nga “extremist” ang pipila sa ilang mga publikasyon. Makadaghan sila mipetisyon sa European Court of Human Rights aron mausab kini nga desisyon.

Si Grigory Martynov, tigpamaba sa mga Saksi ni Jehova sa Russia, miingon: “Nalipay kaayo mi nga nakita sa mga huwes ang kaayohan sa among website ug ang among mga paningkamot nga mosunod sa mga desisyon sa korte sa Russia. Padayon namong depensahan ang among mga publikasyon ug ang katungod sa mga molupyo sa Russia nga matudloan sa Bibliya.”

“Ang mga Saksi sa tibuok kalibotan nalipay niini nga kadaogan,” miingon si J. R. Brown, tigpamaba sa mga Saksi sa ilang world headquarters. “Tungod niini, ang tanang molupyo sa Russia padayong makagamit niining mapuslanon kaayong website nga nagtudlo bahin sa Bibliya.”

Media Contact(s):

International: J. R. Brown, Office of Public Information, tel. +1 718 560 5000

Russia: Grigory Martynov, tel. +7 812 702 2691