NEW YORK—Niadtong Mayo 31, 2017, gihatagan sa Presidente sa Russia nga si Vladimir Putin ug award nga “Parental Glory” ang magtiayong Valeriy ug Tatiana Novik, mga Saksi ni Jehova sa Karelia, nga may walo ka anak, panahon sa seremonyas sa Moscow sa Kremlin.

Ang Order of “Parental Glory” gihimo ubos sa presidential decree niadtong May 2008. I-award sa Russia kini nga pasidungog ngadto sa mga ginikanan nga nakapadako ug labing menos pito ka anak ug nagpakitag talagsaong pag-atiman sa panglawas ug edukasyon sa pamilya, maingon man sa ilang pisikal, mental, ug moral nga pag-uswag. Ang mga pamilyang hatagan niini nga Order pagaisipong mga modelo nga magpalig-on sa pamilya.

Si David A. Semonian, tigpamaba sa mga Saksi ni Jehova sa ilang world headquarters, miingon: “Among giisip kini nga award ingong pag-ila nga ang libreng edukasyon nga gihatag sa mga Saksi ni Jehova gamit ang Bibliya makatabang sa mga ginikanan ug sa ilang mga anak nga mahimong mapuslanong mga molupyo dili lang sa Russia kondili sa tibuok kalibotan. Hinaot kini nga award nga gihatag ni Presidente Putin konsiderahon sa Hulyo 17, 2017, dihang repasohon sa Korte Suprema sa Russia ang desisyon sa pag-liquidate sa Administrative Center sa mga Saksi ni Jehova sa Russia.”

Media Contact:

David A. Semonian, Office of Public Information, +1-845-524-3000