Niadtong Mayo 17 hangtod 26, 2024, kapig 600 ka igsoon sa Serbia ug Montenegro ang miapil sa special preaching campaign nga gihimo sa ubay-ubayng hilit nga mga rehiyon sa Serbia. Kini ang unang in-person preaching campaign nga gihimo sa mga Saksi ni Jehova sa Serbia sa kapin nag 20 ka tuig. Gibanabana nga kapig 1.5 ka milyong tawo—mga 25 porsiyento sa populasyon sa Serbia—ang nagpuyo sa hilit nga mga lugar nga dili pirmeng masangyawan sa mga igsoon. Makapalipay kaayo kay kapig 1,800 ka tawo ang mihangyog pagtuon sa Bibliya panahon sa campaign.

Sa lungsod sa Beli Potok, naay babaye nga giganahan sa pagpakig-estorya sa mga Saksi ug iyang gitawagan ang iyang mga silingan ug giingnan sila: “Naay mga tawo nga moanha ninyo aron sultihan mo bahin sa Diyos ug sa Bibliya. Paminawa sila pag-ayo!” Ang laing babaye nga nagpuyo sa kataposang balay sa baryo eksayted kaayo, maong naghulat siya sa mga Saksi ug gipadayon sila. Miingon siya nga nakatambong na siyag Memoryal sa kamatayon sa Kristo. Lipay kaayo siyang midawat ug pagtuon sa Bibliya.

Samtang nag-cart ang duha ka Saksi sa lungsod sa Smederevska Palanka, ang usa ka lalaki nga ginganlag Radomir miduol. Miingon siya nga lipay kaayo siyang makita sa iyang lungsod ang mga tawo nga motuog Diyos. Dayon nangutana siya bahin sa libreng pagtuon sa Bibliya nga gi-display diha sa cart. Human siya sultihi sa mga igsoon kon sa unsang paagi ginahimo ang atong interactive nga pagtuon sa Bibliya, si Radomir malipayong midawat ug pagtuon.

Panalangin gyod kining special preaching campaign para sa mga igsoon sa Serbia ug para niadtong gustong mokat-on sa mga kamatuoran sa Bibliya.—Juan 7:37.