Niadtong Disyembre 31, 2019, gianunsiyo sa gobyerno sa South Korea nga kadtong gibuhian nga 1,879 nga midumili sa pagsundalo tungod sa ilang pagtuo hatagag espesyal nga amnestiya. Bisag magpabilin ang ilang criminal record, tangtangon sa gobyerno ang bisan unsang civil restriction nga gipahamtang kanila. Kining espesyal nga amnestiya maoy resulta sa mga desisyon sa Constitutional Court ug sa Korte Suprema niadtong 2018, kinsa miila nga ang pagdumili sa pagsundalo tungod sa pagtuo maoy katungod ug dili krimen.

Sa South Korea, ang mga piniriso nga nakaserbisyo na sa ilang sentensiya pahamtangan gihapon sa gobyerno ug lima ka tuig nga mga civil restriction. Kay naa may criminal record kadtong dili magsundalo, gipahamtang sa gobyerno ang maong mga restriksiyon sa atong mga igsoon. Busa, ang atong mga igsoon dili makakuhag eksam aron makabaton ug mga lisensiya nga aprobado sa gobyerno ug dili sab makaaplay sa pipila ka trabaho.

Si Brader Hong Dae-il, nga gikan sa Public Information Desk sa South Korea, miingon: “Mapasalamaton mi nga gitangtang sa gobyerno ang maong mga restriksiyon. Nagpakita ni nga ang gobyerno misugod na sa pag-ila nga kadtong gipriso kay dili magsundalo tungod sa ilang pagtuo dili mga kriminal.”

Samtang nagpaabot ta sa uban pang positibong desisyon sa gobyerno sa South Korea, gihimaya ug gipasidunggan nato si Jehova, ang kinalabwang Tighatag ug Balaod.—Pinadayag 4:11.