Ang tulo ka batan-ong lalaki, si Hye-min Kim, Lak-hoon Cho, ug Hyeong-geun Kim, mibiya sa appeal court nga gawasnon ug mapasalamaton nga wala sila sentensiyahi nga mapriso. Makapahingangha kini nga resulta kay ang ilang kaso may kalabotan sa dili pag-apil sa serbisyo militar tungod sa ilang konsensiya. Tungod niini nga baroganan, ginatos ka lalaki sa South Korea ang mabilanggo kada tuig. Nagdahom kining tulo ka batan-on nga mapriso pod sila kay ang ilang mga amahan ug ang kapig 19,000 nga uban pa napriso man. Ang ilang kagawasan maoy usa sa positibong mga resulta sa makasaysayanhong “not guilty” o dili sad-an nga desisyon sa Gwangju Appellate Court.

Labing menos 200 ka news outlets ang mireport sa maong kaso, nga nagpasiugda dili lang sa resulta unya niining unang “not-guilty” nga desisyon sa appellate court kondili sa nagkadakong interes usab maylabot niining isyuha. Usa ka newspaper nagtawag niining “kinamaayohang desisyon sa korte sa tibuok tuig” ug ang usa pa nagtawag niining nag-una sa lima ka desisyon sa korte sa South Korea sa tuig 2016.

Gipakita sa desisyon sa appellate court nga nagakausab ang panghunahuna sa mga eksperto sa balaod ug sa mga huwes labot niini nga isyu. Diha sa ubay-ubayng kaso di pa dugay, nakita sa mga huwes nga ang batan-ong mga lalaki gipalihok sa ilang tiunay, kinasingkasing nga pagsunod sa moral nga mga prinsipyo ug ang pagmando kanila sa pagserbisyo sa militar o pagsilot kanila tungod sa pagdumili maglapas sa ilang katungod isip may kagawasan sa konsensiya. Mihinapos ang mga huwes nga ang maong mga lalaki adunay “makataronganong basehanan” sa ilang pagdumili sa pagserbisyo sa militar. Imbes isipong naglikay sa pagserbisyo sa militar, ang mga huwes mipakanaog ug 16 ka “not-guilty” nga mga desisyon sa miaging 20 ka bulan.

“Importante kini nga kausaban,” matod sa abogado nga si Du-jin Oh, kinsa naglaban sa daghang conscientious objectors. Miingon siya: “Nalipay kong nakakita nga nagkadaghan ang mga desisyong ‘not-guilty’ sa hukmanan ug kining di pa dugay nga gikan sa high court. Sa matag kaso, ang prosecutor gidahom nga moapelar sa mga desisyon, apan ang dayag nga kausaban sa panghunahuna sa mga maghuhukom sa South Korea nagpakita sa nagkadakong interes ngadto sa mga kaso nga wala pa madesisyoni sa Constitutional Court maylabot sa katungod sa pagpahayag sa konsensiya sa matag tawo.”

Ang tibuok nasod nagpaabot sa desisyon sa Constitutional Court sa South Korea. Gitimbangtimbang pa sa kinatas-ang korte ang gihatag sa konstitusyon nga kagawasan batok sa silot nga ipahamtang sa Military Service Act niadtong magpahayag sa maong kagawasan tungod sa ilang pagsunod sa ilang relihiyosong pagtulon-an o uban pang pagtulon-an nga maoy rason kon nganong midumili sila sa pagserbisyo sa militar.

Si Dae-il Hong, ang national spokesman sa mga Saksi ni Jehova, miingon: “Linibo ka pamilya sa South Korea ang malipayng modawat sa solusyon nga nagtahod sa relihiyosong mga prinsipyo sa mga batan-ong lalaki nga dili mapugos sa pagsupak sa ilang konsensiya. Nanghinaot mi nga ang desisyon sa Constitutional Court makahatag ug dignidad niining mga batan-ona.”