Imbes prisohon lang dayon ang mga Saksi ni Jehova nga dili magsundalo tungod sa konsensiya, ang mga huwes sa South Korea padayong nangitag mga paagi aron makonsiderar ang ilang baroganan. Gihatagag pagtagad sa pipila ka huwes ang motibo niining mga tawhana​—konsensiya nga nabansay sa mga prinsipyo sa Bibliya, dili aron himoag kadaot ang uban. * Busa base sa pangunang katungod sa kagawasan sa konsensiya, ang pipila ka korte nagpakanaog ug desisyon nga kining batan-ong mga lalaki dili sad-an sa pagdumili nga magsundalo. Sukad sa Mayo 2015, ang mga huwes mipakanaog ug 66 ka “not guilty” nga desisyon pabor sa mga Saksi nga wala magsundalo tungod sa konsensiya. Talagsaon kini nga gidaghanon kay sa miaging mga dekada, upat lang ang ingon niana nga desisyon.

Makapahingangha gyod kay niadtong Pebrero 1, 2018, mipakanaog ug samang “not guilty” nga desisyon ang usa ka korte sa apelasyon sa Busan. Wala kini mosunod sa pamalaod sa Korte Suprema ug sa Constitutional Court labot niini nga isyu. Ang maong desisyon talagsaon tungod sa duha ka rason​—ang Distrito sa Busan iladong nagasunod sa nauna nang mga desisyon sa korte, ug ang huwes nga nanguna sa pagpakanaog niini nga desisyon, si Jong-du Choi, nagpakanaog nag “guilty” nga desisyon sa miagi ngadto sa usa nga dili magsundalo tungod sa konsensiya.

Ang panel nga gilangkoban ug tulo ka huwes nagpokus sa konstitusyonal nga obligasyon sa South Korea sa pagtahod sa internasyonal nga mga balaod nga giuyonan sa nasod​—niining bahina, ang International Covenant on Civil and Political Rights (Covenant), nga nag-ila sa katungod sa mga dili magsundalo tungod sa konsensiya. Ang korte miingon nga “ang pagpriso sa mga dili magsundalo tungod sa konsensiya sukwahi sa article 18 sa Covenant, busa, . . . haom lang nga sabtong ang dili pagsundalo tungod sa konsensiya maoy ‘makataronganong hinungdan’” nga ang usa dili magsundalo. Nabalita pag-ayo ang desisyon ug daghan ang nagtuo nga duna unya kiniy positibong epekto sa natad sa balaod.

Sa miagi, matag tuig dihay aberids nga 500-600 ka batan-ong lalaki ang gisentensiyahan sa mga huwes nga mapriso tungod niini nga isyu, apan karon daghang huwes ang naga-postpone ug husay. Ang mga kaso nga wala pa madesisyoni, nga karon kapig 700, nagkadaghan samtang nagpaabot ang mga huwes sa desisyon sa Constitutional Court. Pagka-Disyembre 31, 2017, 267 na lang ka Saksi ang napriso​—ang kinagamyan sulod sa 10 ka tuig.

Ang Constitutional Court maoy magtino kon ipadapat ba sa mga huwes ngadto sa mga dili magsundalo tungod sa konsensiya ang giingon sa Military Service Act nga magsilot sa dili magsundalo o kaha mapanalipdan ba sila sa konstitusyonal nga katungod sa kagawasan sa konsensiya, subay sa internasyonal nga mga sukdanan. Daghan sa South Korea ang naglaom nga ang Korte makakitag solusyon nga motugot sa batan-ong mga lalaki sa pagdawat ug alternatibong serbisyo diha sa komunidad, nga dili makahasol sa ilang konsensiya ug makahatag usab ug kaayohan sa katilingban.

Kon ang desisyon sa Korte niini nga isyu pabor sa mga dili magsundalo tungod sa konsensiya, ang South Korea susama nag desisyon sa UN Human Rights Committee labot sa ginatos ka kaso nga sama niini. Giawhag sa Committee ang South Korea nga hunongon na ang pagpriso sa mga dili magsundalo tungod sa konsensiya ug tahoron ang ilang katungod sa kagawasan sa konsensiya.