Espesyal kaayo sa mga Saksi ni Jehova ang pagministeryo sa bulan sa Nobyembre 2020. Tungod sa makamatay nga pandemic, daghan nato ang nagpondo lang sa balay. Ang naandang mga paagi sa pagsangyaw temporaryong gihunong. Bisan pa niana, ang katawhan ni Jehova milampos sa ilang tibuok kalibotang kampanya sa pagsangyaw sa Gingharian sa Diyos. Sa tibuok kalibotan, minilyon ang naningkamot sa pagpanagtag sa Ang Bantayanang Torre Num. 2 2020 ngadto sa mga negosyohanan, opisyales sa gobyerno, titser, higala, paryente, ug sa publiko. Tungod niini, natudloan ang tanan nga gustong maminaw. Nalipay ug nadasig pod ang tanang nakigbahin niini.

Niay pipila ka eksperyensiya ug komento sa atong mga igsoon sa tibuok kalibotan:

Ang 18 anyos nga si Sister Lucinda Furkin, nga bag-ong nabawtismohan sa Australia, misulat: “Bisag nag-antos kog grabeng mga sakit panahon sa kampanya, gibati nako nga si Jehova nagdasig nako, naggunit sa akong kamot, ug naghatag nakog kusog aron makalahutay.”

Usa ka amahan sa New Zealand ang miasoy kon sa unsang paagi ang kampanya nakatabang sa iyang pamilya: “Ingong ginikanan sa upat ka batang babaye nga nag-edad ug 7, 9, 11, ug 13, giisip namo ang tibuok kalibotang kampanya ingong asaynment gikan sa atong mahigugmaong Amahan, si Jehova. Kini nakatabang sa among pamilya nga mosangyaw kada adlaw panahon sa kampanya.”

Si Kagiso ug Lydia Marumo, nga nag-alagad sa sirkitong buluhaton, nagpadalag elektronikong mga kopya sa magasin ngadto sa ilang dili Saksing mga paryente. Daghan sa ilang paryente ang nagpasalamat. Ang paryente ni Kagiso, nga usa ka doktor, miingon nga tayming kaayo ang pagpadala ni Kagiso sa magasin. Siya miingon nga ang pipila sa iyang mga pasyente naay mga pangutana bahin sa Diyos ug sa Bibliya ug nga ang iyang mga anak nalangkit sa okulto. Gikontak siya ni Kagiso ug Lydia ug nasugdan ang pagtuon sa Bibliya niana mismong gabhiona. Karon, kaduha sila magtuon kada semana.

Si Soroya Thompson, payunir nga sister sa Ontario, misulat: “Ang kampanya nakatabang nako sa pagpokus sa mas importanteng butang ug kon unsa pa ka dako ang buluhaton. Kini nagpahinumdom pod nako sa gugma ni Jehova ug nagpamatuod nga dili niya gusto nga dunay malaglag. Kay gibutang nako ni pirme sa akong hunahuna, nadasig ko nga mas makigbahin sa pagsangyaw panahon sa kampanya.”

Usa ka sister gikan sa British Columbia miingon: “Niining maka-stress nga panahon, midesisyon ko nga mag-oksilyare payunir aron dili na ma-depress. Nakatabang ni nako nga moarang-arang ang akong gibati, ug nakatabang pod ni sa akong pamilya.”

Ang sangang buhatan sa Canada mireport nga ang kampanya nakatabang nga mas masuod ang mga pamilya. Nakatabang sab ni sa mga bata nga mobati nga naa silay nahimo sa ministeryo. Pananglitan, naghimo silag mga sulat o mitabang sa pag-label sa mga sobre, pagbutang ug mga stamp, ug pagpangitag mga adres.

Si Brader ug Sister Tuomisto, nga nag-alagad sa sirkitong buluhaton, miingon: “Ang Nobyembre mao ang kinaduloman nga bulan dinhi sa among lugar. Busa ang mga igsoon, ilabina ang mga payunir, mapasalamaton kaayo sa kampanya, kay nakatabang ni nila nga dili ma-depress.”

Human makapadalag magasin ang usa ka magtiayon ngadto sa ilang kaila, nakadawat silag sulat-pasalamat nga nag-ingon: “Karon, [nagbasa ko sa basahon sa Bibliya] nga Santiago. Kini nag-ingon nga patay ang pagtuo nga walay binuhatan. Ang mga Saksi ni Jehova kanunayng makig-estorya sa mga tawo aron ipatin-aw ug itudlo ang giingon sa Bibliya. Ang ilang gibuhat makapalig-on sa pagtuo.”

Ang sangang buhatan sa Greece mikomento: “Para sa daghan, ang pandemic ug ang mga restriksiyon ug lockdown makapakapoy ug maka-stress. Ang kampanya nakahatag nilag kadasig nga ilang gikinahanglan. Daghan ang miingon nga ang kampanya maoy makaparepresko nga buluhaton!”

Si Sister Suzie Kontargiri nag-oksilyare payunir bisag dili maayo ang iyang panglawas ug dili Saksi ang iyang bana. Siya miingon: “Tungod sa kampanya, ang tanan nakong negatibong hunahuna nawala. Malipayon kong momata kada buntag, mohimo sa mga buluhaton, magluto, mag-atiman sa akong bana, ug dayon magsugod sa pagministeryo. Ang akong bana sagad moingon: ‘Wala ba kay sangyaw ron?’ kay naanad siya nga makita ko nga malipayong nagministeryo uban sa mga sister.”

Si Sister Tamaki Hirota misulat sa mga opisyales sa gobyerno. Siya miingon: “Si Jehova ang unang misangyaw pinaagig sulat. Siya mihimog 66 ka sulat para sa katawhan, nga balikbalik nga ginabasa sa mga tawo sa daghang katuigan aron masuod sila Kaniya. Nahibalo si Jehova nga epektibo kini nga paagi. Kini maoy dili malimtan nga buluhaton.”

Si Sister Meharaja Vijaya ug Imayanathan Amutha nakapadalag sulat sa parehong adres nga wala tuyoa. Wala ablihi sa nakadawat ang unang sulat ug gilabay kini. Dayon nakita niya ang ikaduhang sulat. Nakahunahuna siya nga lagmit importante kaayo ang mensahe sa maong mga sulat kay kaduha ning gipadala. Gibasa niya ang magasin, gitawgan ang sister nga nagpadala sa ikaduhang sulat, ug misugot nga mag-Bible study.

Usa ka opisyales ang mitawag sa sangang buhatan sa Sri Lanka human madawat ang magasin. Siya miingon nga wala pa siya sukad makahibalag ug Saksi ni Jehova bisag Kristiyano siya. Nakadayeg siya sa gihisgotan sa magasin ug sa atong website, dayon nangutana siya: “Unsay akong himoon aron mahimong Saksi ni Jehova?” Gihikay dayon nga ma-follow-up siya.

Gisulti sa usa ka 13 anyos nga magmamantala, nga nag-eskuwela sa eskuwelahan diin sagad ginahisgotan ang politika, kon sa unsang paagi nakatabang niya ang kampanya sa Nobyembre: “Mas may kaisog na ko nga mosulti sa akong mga titser kon nganong neyutral ko. Tungod niini, mas milig-on ang akong pagtuo.”

Kana sab ang gibati ni Sister Margit Haring. Siya miingon: “Nadugangan na ang akong kaisog ug kadasig. Kaniadto, dihang maghunahuna pa lang ko nga makig-estorya sa mga negosyante ug opisyales sa gobyerno, kulbaan na ko. Ang pagdepensa sa akong mga tinuohan sa kalmadong paagi dakog tabang kanako alang sa umaabot.”

Usa ka ansiyano miingon: “Nadasig kaayo ko kay daghan ang nagpayunir bisan pa sa ilang grabeng mga sakit. Puwede nilang hunahunaon nga dili nila kayang magpayunir. Pero nakigbahin gihapon sila sa kampanya. Ang kalipay ug apresasyon nga ilang gipahayag kang Jehova ug sa mga igsoon nakapatandog sa tanan ug nakapalugmaw sa among mga luha.”

Daghan pa kaayong kasinatian ug komento sa tibuok kalibotan, pero dili nato maasoy dinhi tungod sa kadaghan. Makapalipay gyod nga masangyawan ang minilyong tawo sa mensahe sa Gingharian.—Juan 15:11.