Ang mga Saksi ni Jehova sa tibuok kalibotan nanagtag sa publikong edisyon sa Ang Bantayanang Torre Num. 2 2020 niadtong Nobyembre sa mga negosyohanan, membro sa pamilya, ug interesadong mga tawo. Ang espesyal nga bahin sa kampanya mao ang pagpanagtag sa magasin ngadto sa mga opisyales sa tanang ahensiya sa gobyerno. Ang mga sangang buhatan nakadawat ug daghang makapadasig nga sulat-pasalamat.

Sa Sierra Leone, si Rex Bhonapha, Deputy Minister of the Ministry of Lands, Housing, and Country Planning, nagpadalag sulat-pasalamat sa mga igsoon nga nagpadala kaniyag magasin. Siya midugang: “Ang inyong magasin makapalig-on ug matulon-anon kaayo. Apil na ni karon sa akong ginabasa kada adlaw.”

Sa Samoa, ang Prime Minister nagpadalag sulat-pasalamat ug miingon nga gipabilhan niya ang Pag-ampo sa Ginoo. Dugang pa, ang Head of State nga si Tuimalealiifano Vaaletoa Sualauvi II miingon nga gipabilhan niya ang atong buluhaton sa pagtudlog Bibliya. Siya miingon nga kini “dakog tabang sa mga tawo, ug magtudlo nila bahin sa Bibliya aron mabag-o ang ilang kinabuhi.” Gikomendahan sab niya ang mga igsoon tungod sa ilang pagsuspende sa mga tigom sa Kingdom Hall ug sa pagsangyaw sa balaybalay tungod sa COVID-19 nga pandemic.

Si Osvaldo Cartagena García, Municipal Secretary sa Chile, miingon: “Hinaot nga ang inyong maayo kaayo nga kampanya makatabang sa tanang opisyales sa atong nasod, ug magdasig nila sa paghimog maayong mga buhat para sa kaayohan sa mga tawo, ilabina niining gisagubang sa atong nasod karon ug sa tibuok kalibotan.”

Usa ka membro sa German parliament (Deutscher Bundestag) ang misulat sa sangang buhatan sa Central Europe sa Germany: “Nakaila ko sa inyong relihiyon. Bilib kaayo ko sa mga sakop sa inyong relihiyon kay dili sila mahadlok magpaila nga sila mga Saksi ni Jehova. . . . Nahibalo sab ko nga ang inyong relihiyon nag-antos sa kinagrabehang paglutos ubos sa Third Reich (pagmando sa Nazi).”

Dugang pa, ang usa sa mga Federal State Ministries sa Germany nagpasalamat sa mga Saksi sa paghatag niinig paghupay sa mga tawo panahon sa COVID-19 nga pandemic. Sila miingon: “Ang inyong paghupay sa mga tawo dakog natabang aron padayong magkahiusa ang atong nasod.”

Sa Colombia, usa ka membro sa Senado ug membro sa House of Representatives ang misulat sa sangang buhatan aron magpasalamat sa ilang nadawat nga magasin, ug miingon nga ipaambit nila kini sa uban. Usa ka opisyales sa Ministry of Environment and Sustainable Development ang misulat sab: “Salamat kaayo nga gipadalhan ko ninyog Bantayanang Torre nga magasin. Ang mensahe niini makaluwas ug kinabuhi!”

Si Frank Okyere, ambasador sa Ghana didto sa Japan, miingon: “Nindot kaayo ang impormasyon sa magasin kay gipakita niini ang mga solusyon sa daghang problema sa tawo.”

Ang ambasador sa Azerbaijan miingon sab: “Daghan kaayong salamat nga gipadalhan ninyo ang embassy niining espesyal nga isyu sa Ang Bantayanang Torre. Nainteres kaayo ko niini ug gibasa nako ni.”

Mouyon ta sa giingon ni Brader Amaro Teixeira, nga maoy nagdumala sa Public Information Desk sa sangang buhatan sa Mozambique: “Ang resulta niini nga kampanya labaw pa sa among gidahom. Ang mensahe sa Gingharian nakaabot sa mga tawo nga sagad dili masangyawan.”

Seguradong makadawat pa tag dugang nga mga ekspresyon sa pasalamat gikan sa mga opisyales ug sa uban samtang ang mensahe sa Bibliya padayong makaabot “sa tanan nga taas ug katungdanan.”​—1 Timoteo 2:2.