Sa bulan sa Hulyo ug Agosto 2020, minilyon sa atong mga igsoon ug mga interesado, nagkahiusa sa pagtan-aw sa 2020 nga programa sa kombensiyon.

Ang dugay nang gipaabot nga “Paglipay Kanunay”! nga Kombensiyon naplano nang himoon sa mga Assembly Hall, arena, convention center, ug stadium sa 240 ka kayutaan. Aron dili matakdan sa COVID-19 ang mga motambong, midesisyon ang Nagamandong Lawas sa paghimo sa rehiyonal nga kombensiyon sa virtual nga paagi. Kini ang unang higayon sukad sa 1897 nga ang organisasyon wala maghimo ug aktuwal nga kombensiyon.

Si Kenneth Cook, Jr., membro sa Nagamandong Lawas, miingon: “Dihang gikanselar ang rehiyonal nga mga kombensiyon, nagplano mi nga maghimo ug programa nga makita sa tanan sa samang yugto sa panahon. Nahibalo mi nga wala ray upat ka bulan kinahanglang maandam na ang programa sa gatosan ka pinulongan. Sagad kini nga proyekto mokabat ug usa ka tuig o kapin pa gikan sa pagplano hangtod nga mahuman. Nalipay kaayo mi dihang ang unang bahin sa programa na-release sa Hulyo 6, 2020, sa mga 400 ka pinulongan. Naglaom mi nga ang programa ma-release sa 511 ka pinulongan!”

Kon bahin sa mga benepisyo sa virtual nga kombensiyon, usa sa atong sister nga nag-inusarang ginikanan ug may tulo ka anak miingon: “Bisan tuod ug mingaw nga dili nato makauban ang atong mga igsoon, nakabenepisyo kaayo ini ang mga bata. Tungod kay hugnahugna ang pagtan-aw sa programa, makapokus ang mga bata sa pagpaminaw. Kon gusto silang mohunong kadiyot sa pagtan-aw, among i-pause ang programa. Wala gyod silay malaktawan nga bahin sa programa. Gipasiugda sa Biyernes nga sesyon nga ang mga anak samag mga udyong nga kinahanglang ipuntirya ngadto sa malipayong kinabuhi sa pag-alagad kang Jehova. Ang virtual nga kombensiyon nakatabang nako sa paghimo ana.”​—Salmo 127:4.

Kining makasaysayanhong virtual nga kombensiyon namatikdan sa international media. Pananglitan, si Robert Hendriks, nga maoy nagdumala sa Public Information Desk sa United States mikomento: “Daghang journalist ang nagsulat ug mga eksperyensiya bahin sa virtual nga kombensiyon. Ang report nag-ingon nga gigamit sa atong organisasyon ang teknolohiya sa pag-broadcast sa programa sa kombensiyon ug sa samang higayon naghatag ug dakong pagtagad sa safety sa tanan.”

Ang 2020 “Paglipay Kanunay”! nga Kombensiyon nagpakita nato sa bag-ong paagi nga si Jehova ang atong Dakong Instruktor.—Isaias 30:20.