Talagsaon kaayo ang 2020 nga Memoryal sa kamatayon sa Kristo. Sa unang higayon, ang programa sa Memoryal gi-broadcast sa TV ug radio diha sa daghang pinulongan sa ubay-ubayng dapit sa Africa.

Pinaagi niini, kapig 407,000 ka magmamantala ang nakatan-aw sa programa sa Memoryal, wala pay labot niana ang wala mahibaloi nga gidaghanon sa mga interesado. Bisag wala mahibaloi ang katibuk-ang gidaghanon sa nakatan-aw, ang programa gi-broadcast sa dapit nga kapig 150 ka milyon ang populasyon.

Tungod sa COVID-19 nga pandemic, ang kadaghanan mitambong sa Memoryal pinaagig videoconference. Pero daghang magmamantala sa Africa ang nagpuyo sa mga lugar diin mahal ang Internet ug ang pag-connect gamit ang cellphone maong dili sila maka-stream o maka-download ug video. Busa giaprobahan sa Nagamandong Lawas ang pipila ka sangang buhatan nga makigkontrata sa lokal ug nasyonal nga mga estasyon sa TV ug radyo aron ma-broadcast ang programa sa Memoryal nga dili kaayo mahal ang bayad.

Sa wala pa ang Memoryal, 11 ka sangang buhatan—Angola, Benin, Cameroon, Côte d’Ivoire, Democratic Republic of the Congo, Ghana, Malawi, Mozambique, Senegal, Zambia, ug Zimbabwe—ang nakigkontrata sa mga broadcasting company ug gihikay nga ma-broadcast ang pakigpulong sa Memoryal sa kapig 36 ka lokasyon diha sa 16 ka nasod.

Angola

Dunay unom ka estasyon sa radyo nga miuyon nga i-broadcast ang programa sa Memoryal diha sa unom ka pinulongan: Ibinda, Kikongo, Kimbundu, Nyaneka, Portuguese, ug Umbundu. Ang sibya niini nga mga estasyon sa radyo madunggan sa pipila ka parte sa nasod nga daghag tawo.

Democratic Republic of the Congo

Dihay Bible study nga nagplanong motan-aw sa programa sa Memoryal nga siyasiya ra, kay ang iyang pamilya supak sa mga Saksi ni Jehova. Pero dihang padulong na siyang motan-aw sa pakigpulong sa Memoryal, nanawag ang iyang papa diha sa sala, “Nagsugod na!” Miadto siya sa sala, ug nakurat siya pagkakita niya nga ang tibuok niyang pamilya tua didto aron motan-aw sa programa sa Memoryal sa TV. Napulo ka membro sa iyang pamilya ang nanan-aw sa Memoryal.

Sa baryo duol sa Luena, dihay dili Saksi nga miingon: “Walay gihimo ang among mga pastor. Pero kamo nagpadayon sa pagsimba sa inyong Diyos bisan sa panahon sa COVID-19 nga pandemic. Moapil mi ninyo!”

Ghana

Miuyon ang usa ka estasyon sa TV nga i-broadcast ang programa sa Memoryal sa Twi. Nagpagawas pa gani ang estasyon ug advertisement nga nagdapit sa mga tawo sa pagtan-aw sa Memoryal. Dili lang kay Memoryal ang gi-broadcast sa estasyon. Nagpasalida usab kinig mga video nga Nganong Namatay si Jesus? ug Nganong Gitugotan sa Diyos ang Pag-antos?, ingon man ang mga music video nga Sa Bag-ong Kalibotan ug Duol Na Gyod Kaayo.

Senegal

Usa ka sister ang miingon: “Ginahisgotan si Jehova diha sa TV ug radyo. Wa mi katuo! Lipay kaayo mi. Mao nay atong Diyos, si Jehova!”

Matod sa usa pa ka sister: “Pagkadungog nako nga ang pakigpulong sa Memoryal i-broadcast sa TV, nakaingon ko sa akong kaugalingon, ‘Wala mi makaapil sa kampanya sa Memoryal tungod sa COVID-19. Pero tungod kay ma-broadcast kini sa TV, daghan gihapon ang makatan-aw sa Memoryal.’ Gitawagan dayon nako ang akong mga Bible study, mga balikduaw, ug tanan nakong mga kaila nga dili Saksi aron pahibaloon sila sa broadcast. Siyam sa akong mga Bible study ug ilang pamilya ang nakatan-aw sa pakigpulong. Ang akong ig-agaw nga mitan-aw sa programa sa TV sa Ziguinchor nangutana kon puwede ba ming maghisgot pag dugang bahin sa programa, ug malipayon ko nga misugot.”

Kini nga espesyal nga kahikayan dugang nagpamatuod nga kang Jehova, “ang tanang butang posible.”​—Mateo 19:26.