Tungod sa COVID-19, lisod para sa mga igsoon nga naa sa mga ospital ug nursing home ang pagtambong sa Memoryal. Dili sila makabiya sa pasilidad ug dili pod puwede ang mga bisita. Bisan pa niana, sa tabang sa mga ansiyano, kini nga mga igsoon nakaapil sa pagsaulog sa labing importanteng okasyon sa tibuok tuig.

Sa Naju City, gusto ni Sister Lee Jeom-soon (91 anyos) ug ni Sister Kwon Ae-soon (88 anyos), kauban ang usa ka interesadong babaye (96 anyos), nga motambong sa Memoryal. Dunay doktor nga Saksi ni Jehova sa ilang nursing home. Human makatambong ug Memoryal kini nga brader sa ilang balay uban sa iyang kongregasyon, mibalik siya sa nursing home. Gitabangan niya nga ma-stream ang programa sa Memoryal gikan sa jw.org para sa duha ka sister ug sa interesadong babaye. Nagdala usab ang maong brader ug mga emblema.

Sa Uijeongbu City, si Brader Choi Jae-cheol nagtrabaho sa nursing home nga gipuy-an sa 14 ka edarang igsoon. Bisan pa sa pandemic, natabangan niya ang mga igsoon didto, kauban ang mga interesado, sa pagsaulog sa Memoryal pinaagig video streaming. Nasugdan ang mga pagtuon sa Bibliya sa pipila ka interesado nga mitambong sa programa.

Si Sister Kim Tae-sun 59 anyos ug nagpuyo sa Cheonan. Lima ka tuig kanhi, nadayagnos si Sister Kim nga duna siyay kanser. Di pa dugay, naospital siya kay grabe ang iyang gibati nga sakit. Kauban niya sa iyang kuwarto ang 69 anyos nga sister nga si Kim Jeong-mi. Siya duna poy kanser. Tungod sa pandemic, dili sila makagawas sa ospital. Pero sa tabang sa ilang mga ansiyano, nakatambong sila sa Memoryal kauban ang ilang mga kakongregasyon pinaagig videoconference.

Kini nga mga sister misulat sa mga ansiyano ingong pagpasalamat. Sila miingon: “Salamat sa pagtabang namo nga makatambong sa Memoryal ug makauban ang atong mga igsoon bisan pa sa COVID-19 ug sa among grabeng sakit.”

Si Sister Mieko Fujiwara, usa ka 70 anyos nga sister nga nagpuyo sa Mie Prefecture, Japan, naospital. Kay wala may Wi-Fi sa ospital, dili siya maka-connect sa Memoryal sa iyang kongregasyon pinaagig videoconference. Pero una pa niana, gipadad-an na siya sa ilang ansiyano ug sa iyang asawa ug recording sa pakigpulong sa Memoryal diha sa iyang cellphone, mao nga nakatan-aw siya sa pakigpulong diha sa iyang kuwarto sa ospital.

Sa Zama City, Kanagawa Prefecture, ang 102 anyos nga si Sister Yuki Takeuchi nagpuyo sa usa ka nursing home. Sa wala pa ang Memoryal, gipadad-an na siya sa iyang anak ug umagad ug tinapay ug bino. Busa nakasaulog siya sa Memoryal kauban nila pinaagig telepono.

Ang iyang umagad nga si Brader Mimura miingon: “Ang akong ugangan nabawtismohan niadtong 1954 ug wa gyod siya sukad mopaltag tambong sa Memoryal. Bisag talagsaon kini nga Memoryal, lipay kaayo siya nga nakatambong siya karong tuiga.”

Segurado ta nga nakita ni Jehova ang mga paningkamot niini nga mga magmamantala nga edaran ug dunay sakit sa pagsaulog sa Memoryal sa tabang sa mga ansiyano.—Hebreohanon 6:10.