Samtang nagpadayon ang pagkuyanap sa COVID-19 nga pandemic sa tibuok kalibotan, gipangusgan sa mga Saksi ni Jehova ang ilang pagsangyaw panahon sa Memoryal. Ingong resulta, daghang tawo ang mibisita sa jw.org nga website aron mahupayan sa Bibliya ug masayod sa mga balita. Sa Marso, ang gidaghanon sa mga mibisita sa website misakag kapig 50 porsiyento kay sa Pebrero ug narekord ang kinadaghanang hangyo alang sa pagtuon sa Bibliya.

Pagsugod sa pandemic, anam-anam nga midaghan ang mga mibisita sa jw.org. Niadtong Pebrero, dihay mga duha ka milyon nga nagabisita kada adlaw, nga mao ang sagad nga gidaghanon. Sa Marso, kini nga gidaghanon misaka sa kapig tulo ka milyon kada adlaw, ug dihay kapin sa upat ka milyon ug tunga nga mga mibisita sa mga adlaw nga gi-release ang mga special news update bahin sa coronavirus. Sa Abril 7, sa adlaw sa 2020 nga Memoryal, dihay kapig pito ka milyon nga mibisita sa website, nga ang kadaghanan niini mitan-aw sa espesyal nga morning worship program ug sa pakigpulong sa Memoryal.

“Niining panahona sa tuig, daghang tawo ang mobisita sa jw.org aron masayod kon asa ug kanus-a ipahigayon ang Memoryal,” miingon si Brader Clive Martin, kinsa nagdumala sa MEPS Programming Department sa tibuok kalibotang hedkuwarter sa mga Saksi ni Jehova sa Warwick, New York. “Niining tuiga, kay daghang interesado ang dili makatigom uban sa lokal nga mga kongregasyon, among gibutang sa website ang 2020 nga espesyal nga pakigpulong ug pakigpulong sa Memoryal sa kapig 500 ka pinulongan. Minilyon ang mitan-aw ug mi-download niini nga mga programa. Ang kadaghan sa mga mibisita sa website panahon niini nga pandemic nagpakita nga ang jw.org importante sa pagtaganag mga paghupay ug instruksiyon gikan sa Bibliya dili lang para sa mga Saksi ni Jehova kondili para usab sa uban.”

Dili ikatingala nga daghan sa mga mibisita sa website nangitag mga impormasyon bahin sa panglawas ug sa paglikay sa sakit, apil ang mga topiko sama sa stress ug kabalaka. Nagkadaghan usab ang nangitag mga impormasyon diha sa website bahin sa ilhanan sa kataposang mga adlaw ug sa upat ka mangangabayo sa Pinadayag kapitulo 6.

Makapainteres nga midaghan ang mga hangyo alang sa pagtuon sa Bibliya, nga kasagaran mga 250 kada adlaw. Sa bulan sa Marso, kana nga gidaghanon misakag 40 porsiyento, nga miabot ug mga 350 kada adlaw o kon sumahon mga 11,000 ang nagpa-Bible study nianang bulana. Sulod sa 48 ka oras, sukad sa adlaw sa Memoryal hangtod sa pagkasunod adlaw, kapig 1,000 ang mihangyo online alang sa pagtuon sa Bibliya.

Si Jesus miingon nga kadtong mga mahunahunaon sa ilang espirituwal nga panginahanglan magmalipayon. (Mateo 5:3) Makapalipay nga daghan kaayo ang midangop kang Jehova ug sa iyang organisasyon alang sa paghupay ug tabang niining lisod nga mga panahon.​—2 Corinto 1:3, 4.