Niadtong Abril 7, 2020, ang mga Saksi ni Jehova sa tibuok kalibotan nagsaulog sa Memoryal sa kamatayon ni Jesu-Kristo bisan pa sa coronavirus nga pandemic. Sumala pa sa giingon ni Brader Stephen Lett sa Nagamandong Lawas: “Wala gyoy virus, wala gyoy bisan unsang pandemic, ang makababag nato nga ipakita ang atong apresasyon sa gihimo ni Jehova ug ni Jesus alang kanato. Walay makapaluya sa atong determinasyon nga saulogon ang Panihapon sa Ginoo.” Sa unsang paagi tinuod ni niining tuiga?

Kini ang una sa serye sa mga artikulo diha sa atong seksiyon nga Balita nga mag-asoy kon giunsa pagsaulog sa atong mga igsoon sa tibuok kalibotan ang Memoryal panahon sa coronavirus nga pandemic. Niining unang artikulo, hisgotan nato kon giunsa pagsaulog ang Memoryal sa tibuok kalibotang hedkuwarter sa mga Saksi ni Jehova ug sa sangang buhatan sa United States.

Ingong pagsunod sa mga restriksiyon sa gobyerno bahin sa publikong mga panagkatigom, ang Nagamandong Lawas midesisyon nga dunay usa ka programa sa Memoryal nga makita sa tanang membro sa pamilyang Bethel. Ang pakigpulong gihimo sa awditoryum sa Warwick. Si Brader Anthony Morris mao ang mihatag sa pakigpulong. Ang tanang membro sa pamilyang Bethel sa United States makatan-aw sa programa sa ilang kuwarto. Bisag diyutay ra ang mga moambit, gitagan-ag mga emblema sa Bethel Office ang tanan sa pamilya.

Makakonektar sab ang mga Bethelite sa programa sa Memoryal sa ilang kongregasyon pinaagig videoconference. Dugang pa, ang mga Bethelite nga ansiyano makahatag sab ug pakigpulong sa Memoryal pinaagig videoconference.

Daghan sa pamilyang Bethel ang miingon nga espesyal kaayo ni nga Memoryal. Bisag wala sila magkauban sa personal sa ilang mga isigkamagsisimba, gibati nila nga nahiusa sila sa ilang mga igsoon sa tibuok kalibotan sa paghandom sa duha ka kinadak-ang kapahayagan sa gugma—ang gugma sa atong Diyos nga Jehova ug sa iyang pinalanggang anak nga si Jesu-Kristo.—Juan 3:16; Mateo 20:28.