Sa miaging lima ka tuig, ang mga igsoon sa tibuok kalibotan nalingaw sa pagtan-aw sa binulang espirituwal nga programa sa JW Broadcasting. Samtang naghinamhinam ta sa mga broadcast sa 2020 nga tuig sa pag-alagad ug sa umaabot pa nga mga tuig, matikdi kining pipila sa talagsaong mga kalamposan sukad sa unang broadcast niadtong Oktubre 2014.

Gihubad sa 185 ka pinulongan. Sa sinugdanan, English lang ang binulang broadcast. Dayon, sa Mayo 2015, giaprobahan sa Nagamandong Lawas nga ang mga broadcast hubaron sa kapig 40 ka pinulongan. Karon, mga upat ka tuig lang ang milabay, ang mga broadcast gihubad sa 185 ka pinulongan.

Naghisgot sa lainlaing bahin sa kalibotan. Kay ang broadcast para man sa mga igsoon sa tibuok kalibotan, nagkadaghan ang mga video nga ginahimo sa mga video team gikan sa lainlaing bahin sa kalibotan. Sagad ang mga broadcast taposon pinaagig video clip nga nagpakita sa mga kongregasyon sa hilit nga mga lugar, apil nianang naa sa Ethiopia, Iceland, Mongolia, Saipan, Tuvalu, ug Uganda. Ang JW Broadcasting ginatan-aw sa 230 ka nasod, apil ang layo kaayong mga lugar sama sa Heard Island and McDonald Islands, nga walay permanenteng residente ug duol sa Antartika. Sa unang bulan human i-release ang bag-ong broadcast, ang aberids sa mga motan-aw o mo-download maoy mga 8.6 ka milyon.

Daghan ug lainlain ang content. Kapig 60 ka oras sa orihinal nga content ang nahimo na, apil ang mga pakigpulong, interbiyo, eksperyensiya, news update, ug dramatization. Sukad sa pag-release sa unang orihinal nga kanta, ang The Best Life Ever, nahimo nang regular nga bahin sa binulang broadcast ang mga music video. Kini nga mga kanta gihubad sa 368 ka pinulongan.

Mga host. Sa sinugdanan, mga membro sa Nagamandong Lawas lang ang mag-host sa matag programa. Sa ulahi, ang mga katabang sa mga komite sa Nagamandong Lawas gigamit aron mahimong kaubang host ug usahay mag-host sa broadcast. Tanantanan, 29 ka lainlaing brader ang naka-host o nahimong kaubang host sa binulang broadcast.

Mga Pasalamat. Usa ka brader sa United States nga na-stroke ug padayong nag-antos sa mga epekto niini mapasalamaton kaayo sa orihinal nga mga kanta. Siya miingon: “Ang nindot nga mga musika nga magpalig-on sa pagtuo kang Jehova ug sa iyang Pulong nakahatag nakog positibong panglantaw ug nakatabang gyod nako sa pagsagubang niining bag-ong pagsulay sa akong kinabuhi. Nahingangha gyod ko kay kini nga musika dako kaayog natabang nako sa pagpauswag sa akong Kristohanong mga hiyas. Salamat kaayo niini nga tagana!”

Human matan-aw ang Nobyembre 2016 nga broadcast, ang usa ka pamilya sa United States nga namatyag anak nga lalaki tungod sa kanser misulat: “Naghilak mi samtang nagtan-aw sa music video nga Just Around the Corner. Naimadyin namo nga kami tong ginikanan sa video nga naa sa paraiso. Dihang morag dili na nako makaya ang kasakit sa akong gibati, kanunay ming pahinumdoman ni Jehova nga nakasabot siya ug nga tabangan mi niya sa pagsagubang niini. Kini nga video tubag gyod ni Jehova sa daghan namong kinasingkasing nga pag-ampo.”

Usa ka magtiayon sa Ukraine nagpasalamat sa binulang mga broadcast. Sila miingon: “Salamat sa JW Broadcasting, kay tungod niini ang mga membro sa Nagamandong Lawas nahimong membro sa among pamilya!”

Mapasalamaton ta kang Jehova niining haom sa panahon nga tagana, nga padayong naghiusa sa iyang katawhan sa tibuok kalibotan.​—1 Pedro 2:17.