Ang novel coronavirus (COVID-19) pandemic nakaapektar sa milyonmilyong Saksi ni Jehova kinsa naningkamot sa pagsunod sa lokal nga mga awtoridad samtang nagpadayon sila sa pagsimba kang Jehova. Sa mga lugar nga grabeng naapektohan sa virus, ang mga igsoon naggamit ug lainlaing paagi aron makapadayon sa pagsangyaw.

Ang usa ka brader sa Pisa, Italy, miingon: “Nindot kaayo ang among eksperyensiya sa ministeryo! Kay kadaghanan sa mga tawo naa ra sa balay, gi-check namong magtiayon ang among mga kontak diha sa cellphone ug gisulayan namo ang pagpakig-estorya sa daghan kanila pinaagig videoconference. Daghan kaayo mig na-Bible study ug nabalikduaw, ang pipila bag-o namong naestorya ug ang uban naestorya na namo sa una. Nakagugol mig daghang oras sa ministeryo, ug daghan ang nakig-estorya namo.”

Sa South Korea, ang mga igsoon pirme nang mogamit sa mga feature sa atong jw.org nga website ug sa JW Library app. Pananglitan, ang usa ka brader kalit nga nakadawat ug text gikan sa iyang kanhing Bible study nga tulo ka tuig nang mihunong sa pagtuon. Ang Bible study miingon nga tungod sa pandemic nakahunahuna siya sa ilhanan sa kataposang mga adlaw. Nagamit sa brader ang “Share Link” nga feature sa JW Library app aron makapadala sa kanhing Bible study ug importanteng impormasyon bahin sa kataposang mga adlaw pinaagig text. Ang brader miingon nga “makapadasig nga kini nga ebidensiya sa ilhanan sa kataposang mga adlaw nakapukaw sa espirituwal nga panginahanglan sa daghang tawo.”

Ang daghang report gikan sa lainlaing sangang buhatan sa tibuok kalibotan nagpamatuod nga gipabilhan sa mga igsoon ang ilang ministeryo. Makapalipay gyod ang pagkahibalo nga ilang gigamit ang “praktikal nga kaalam” aron padayon silang makasangyaw sa maayong balita.—Miqueas 6:9.