Si Brader Femi Durodola ug ang iyang asawa, si Yana, nakamatag alas singko sa buntag kay nanawag ang ilang ansiyano. “Ang brader miingon: ‘Ayawg kabalaka, pangandam lang. Ang mga sundalo sa Russia nagpaingon sa Kyiv!’” miingon si Yana. “Niadtong higayona, gikulbaan kog maayo.”

Ang bag-ong magtiayon nag-ilis, nag-andam sa kataposang kape nga ilang imnon sa ilang balay, ug nagbasag teksto nianang adlawa. Kini nag-ingon: “Mahimo mong kusgan kon magpabilin mong kalmado ug mosalig mo.” (Isaias 30:15) Si Femi kinasingkasing nga nag-ampo kang Jehova. Gikuha ni Femi, nga taga-Nigeria, ug ni Yana, nga taga-Ukraine, ang ilang go bag ug gibiyaan nila ang tanan aron mangitag kadangpan sa Netherlands.

Mao ni ang nahitabo sa kadaghanang igsoon nga midesisyon sa pagbiya sa Ukraine human miatake ang Russia niadtong Pebrero 24, 2022. Naay mga 130,000 ka Saksi ni Jehova sa Ukraine. Sa pagkakaron, kapig 36,000 na ka Saksi ang midesisyon nga mobiya sa ilang balay ug kapig 16,000 kanila ang mibakwet sa laing nasod. Daghan kanila ang mibiya sa ilang balay, trabaho, ug kongregasyon. Panahon sa giyera, ang mga lalaki sa Ukraine nga 18 hangtod 60 anyos wala tugoti nga mobiya sa nasod. Pero ang mga lalaki nga citizen sa laing nasod gitugotan rang mobiya.

Kadtong mobiya makadala rag pipila ka importanteng butang. Mobiyahe sila ngadto sa mas luwas nga lugar sakay sa tren o bus, ug dili ni sayon nga pagbiyahe. Usahay, wala sila mahibalo kon asa paingon ang biyahe. Ang ilang lig-ong pagtuo kang Jehova naghatag nilag kaisog nga mobiya sa mga siyudad nga naigo sa giyera, ug dili sila segurado kon makabalik pa ba sila.

“Gibiyaan namo ang tanan. Gamay ra mig gidala,” miingon si Yana. “Kini nga situwasyon nagpahinumdom gyod namo nga ang pinakaimportante mao ang among relasyon kang Jehova.”

Ang kusog nga mga sirina ug pagbuto sa bomba madungog duol sa balay ni Sister Lilia Antoniuk sa Kyiv. Diha sa kadalanan, naay nasunog nga mga sakyanan ug nagkatag ang mga parte sa bilding ug tulay.

Si Lilia ug ang iyang anak nga babaye, si Oleksandra (17 anyos), midesisyon nga mobiya sa nasod. Sulod sa pipila ka adlaw, mibiyahe sila ngadto sa Poland sakay sa puno kaayo nga tren. Gamay ra kaayo ang ilang pagkaon ug nagtindog lang sila sulod sa daghang ka oras. Namenosan ang ilang kabalaka dihang nakaabot sila sa Przemyśl, Poland.

“Dihang nakita namo ang mga igsoon nga nagdalag ‘JW.ORG’ nga karatula, kabalo mi nga ma-okey ra ang tanan,” miingon si Lilia. Gidala sila sa Kingdom Hall aron makakaon ug makapahulay. Dayon gihatod sila sa balay diin sila mag-estar.

“Gibati namo ang pagmahal ni Jehova ug nalig-on ang among pagtuo,” miingon si Lilia, nga karon naa na sa Germany. “Mapasalamaton kaayo ko kang Jehova sa iyang gugma ug sa mga igsoon nga andam motabang panahon sa kalisdanan.”

Giasoy ni Sister Anastasiia Kovalyova kon giunsa pag-atake ang siyudad sa Zaporizhzhia. Nakita niya ang kahayag tungod sa pagbuto sa mga bomba ug madungog ni sa iyang apartment. Tungod sa way hunong nga pagpamomba, na-trauma ang iyang mga pag-umangkon, nga nag-edad ug pito ug tulo, maong ang pamilya midesisyon nga mobiya. “Kay di mi kadalag daghan, kulang mig sinina ug ubang gamit,” miingon si Anastasiia. “Pero gitagan-an mi sa mga igsoon. Naa ang tanan namong gikinahanglan ug sobra pa gani.” Si Anastasiia, ang iyang binalaye nga si Anya, ug ang mga bata mibiyahe ngadto sa Germany agi sa Poland.

Si Sister Anastasiia Shchukina ug ang iyang mama, si Sister Olha Lysenko, motago sa bugnaw nga basement sa ilang gamayng balay sa matag higayon nga motingog ang sirina. Kining payunir nga mga sister nag-alagad sa gamayng lungsod sa Brailiv, Vinnytsia Oblast diin mas dako ang panginahanglan. Naglisod silag desisyon kon mobiya ba sila o dili, pero sa ulahi nakadesisyon silang mobiya dihang peligroso na kaayo ang situwasyon. Nagdala lang sila sa ilang gikinahanglan ug mibiyaheg duha ka adlaw pinaagig tren, ug sa ilang pagbiyahe wala kaayo silay tulog. Dili to sayon para kang Olha, nga 58 anyos ug naay sakit. Nakaabot sila sa Rzeszów, Poland sa alas dos sa buntag. Giabiabi sila sa mga igsoon didto. “Gihulat mi sa mga igsoon bisag kadlawon na,” miingon si Anastasiia. “Mapasalamaton kaayo mi kang Jehova ug sa mga igsoon.”

Sa siyudad sa Sumy, si Brader Andrzej Chyba—usa ka Polish citizen—ug ang iyang asawa, si Elizabeth, nga taga-Britain, nanago sa basement sa balay sa igsoon, kauban ang lima pa. Madungog nila ang naglupadlupad nga mga fighter jet, pinusilay, ug pagpamomba. Nakabatog kaisog ang mga igsoon dihang gitan-aw nila ang drama sa Bibliya nga Oh Jehova, . . . Ako Nagasalig Kanimo, nga naghisgot sa gihimo ni Haring Ezequias dihang gisulong sa mga Asiryanhon ang Jerusalem.

“Ang mga igsoon nagpadala namog mga pagdasig, sama sa pagdasig nga basahon ang Salmo 27,” miingon si Andrzej, nga karon naa na sa Poland uban sa iyang asawa.

Masaligon ta nga si Jehova magpanalangin sa mga igsoon kinsa ‘mibiya sa tanan nilang materyal nga butang’ samtang malaomon sila sa umaabot nga wa nay giyera.—Filipos 3:8.