Niadtong Hunyo 1, 2023, gibalik ang pag-tour sa daghang pasilidad sa Bethel sa tibuok kalibotan. Human ni sa kapig tulo ka tuig nga walay tour tungod sa COVID-19 nga pandemic. Espesyal kaayo ni nga adlaw para sa pamilyang Bethel sa tibuok kalibotan ug sa daghan kaayong mi-tour.

Samtang miabot ang mga bisita, giabiabi sila sa mga Bethelite pinaagig mga welcome sign, kanta, tam-is nga mga pahiyom, ug mga gakos. Si Ellis Bott, nga nagsugod pag-alagad sa world headquarters sa Warwick, New York panahon sa pandemic, miingon: “Nindot kaayong tan-awon ang mga Bethelite nga naglinya sa gawas sa lobby nga nagdalag mga welcome sign! Ang mga luha sa kalipay nga akong nakita nagpahinumdom nako kon unsa ka espesyal ang Bethel.” Si Alexis Alexander, nga part-time commuter sa Bethel, eksayted kaayo nga moapil sa pag-welcome ug pag-abiabi sa mga nag-tour. Siya miingon: “Makapalipay nga makita ang gugma sa mga igsoon para kang Jehova ug sa Iyang balay.”

Si Mi-yeon Jo eksayted kaayo nga madala na gyod niya ang iyang otso anyos nga anak, si Yoon, sa pag-tour sa sangang buhatan sa South Korea. Eksayted kaayo si Yoon nga maka-tour sa Bethel maong halos wala siya katulog anang gabhiona. Si Mi-yeon miingon: “Pagmata gyod namo, naminaw mi sa kanta bahin kang Caleb ug Sophia nga mibisita sa Bethel. Ug gipaminaw pa gani namo ni dihang padulong mi didto.” Si Yoon nag-enjoy kaayo ug miingon: “Animals na lang ang kulang, maparaiso na ang Bethel.”

Si Noah Johnsen, batan-on nga taga-Alberta, Canada, ug naay sakit nga spinal muscular atrophy, dugay na nga gustong mag-tour sa Bethel sa New York, U.S.A. Kay dili man itugot sa iyang kahimtang nga mobiyahe pinaagig eroplano, ang iyang ginikanan nagdrayb ug mga 4,100 kilometros (2,500 mi) aron maka-tour sila sa sangang buhatan sa United States sa Wallkill, New York. Human sa ilang tour, si Noah miingon: “Usa lang gyod ka pulong ang akong masulti bahin sa among pag-tour—gugma. Gibati nako nga gimahal ko ni Jehova ug sa mga igsoon.”

Si Fyodor Zhitnikov (76 anyos) ug ang iyang asawa nga si Yulita, eksayted kaayo nga mag-tour sa museum sa Bethel sa Kazakhstan. Ang usa ka seksiyon sa museum nag-feature sa pipila ka igsoon nga matinumanong milahutay sulod sa daghang katuigan. Espesyal kaayo ni nga exhibit para kang Fyodor kay daghan sa maong mga igsoon ang nakauban niya. Mapasalamaton kaayo si Fyodor sa mga paningkamot nga maandam ni nga exhibit. Siya miingon: “Kon ang mga igsoon man gani nakahimo sa pagpreserbar sa among mga rekord sa ministeryo ug pag-alagad, labaw na gyod nga dili kalimtan ni Jehova ang tanan namong gihimo para kaniya.”

Nalipay ta nga maabiabi na pod nato pag-usab ang mga mobisita sa Bethel sa tibuok kalibotan. Naghinamhinam ta nga abiabihon ang daghan pang mo-tour sa umaabot!—Salmo 122:1.

Makita sa ubos ang mga picture sa mga igsoon nga nag-tour sa mga pasilidad ug museum sa lainlaing Bethel.