Ang atong mga igsoon sa tibuok kalibotan naggamit sa mga artikulo nga gi-feature sa jw.org home page diha sa ilang ministeryo ug personal nga pagtuon. Kini naay maayong resulta, ingon sa gipakita sa mosunod nga mga eksperyensiya.

Sa unang mga bulan sa pandemic, usa ka tigdumala sa sirkito sa Canada nagreport nga mga 75 porsiyento sa mga magmamantala sa iyang sirkito ang naggamit sa artikulong “Kon sa Unsang Paagi Magmalipayon Bisag Nag-inusara” diha sa ministeryo. Pananglitan, usa ka sister ang nagpadalag link sa maong artikulo ngadto sa unom niya ka kauban sa trabaho. Daghan nila ang mapasalamaton niini.

Ang laing sister sa Togo nga nag-alagad sab sa sirkitong buluhaton uban sa iyang bana nagpadala ug link sa artikulong “Ang Upat ka Mangangabayo sa Pinadayag” ngadto sa mga paryente ug kaila. Ingong resulta, nagdumala na siya karon ug pito ka pagtuon sa Bibliya.

Tungod sa COVID-19 pandemic, ang mga estudyante sa pipila ka nasod nag-eskuwela pinaagig videoconferencing. Usa ka batan-ong sister sa Scandinavia ang nagpasalamat sa di pa dugayng artikulo nga “Sa Unsang Paagi Ko Molampos sa Pag-eskuwela sa Balay?” nga para sa mga estudyante nga ingon anig kahimtang. Siya miingon: “Pirme kong ma-late sa paghuman sa akong mga asaynment. Pero dihang gisunod nako ang mga sugyot niining artikuloha, natabangan gyod ko.”

Kapig 1,600,000 ka indibiduwal ang moabli sa jw.org home page kada adlaw.

Mapasalamaton ta kang Jehova niini nga mga artikulo nga nakatabang nato sa atong personal nga pagtuon ug sa ‘pagtuman sa bug-os sa atong ministeryo.’—2 Timoteo 4:5.