Sa 2020 tuig sa pag-alagad, ang mga Saksi ni Jehova nakaatubang ug mga kalisdanan sa ilang pag-alagad sa Diyos nga wala pa nila masinati sukad. Pero kini nga mga kalisdanan nagpakita sab sa determinasyon sa atong mga igsoon nga magmaunongon sa Diyos ug magkahiusa.

Ang pangunang hinungdan sa kalisdanan mao ang COVID-19 nga pandemic, nga nagpahinabog grabeng mga problema sa tibuok kalibotan nga wala maeksperyensiyahi sa katawhan sulod sa daghang katuigan.

Ang mga Saksi ni Jehova mihimo dayog mga kausaban panahon sa pandemic. Nakahunahuna silag bag-ong mga paagi sa pagtigom, pagdinasigay sa usag usa, ug pagsangyaw sa maayong balita.

Niay pipila sa ‘maayong mga balita’ gikan niining talagsaon kaayo nga tuig.​—Proverbio 15:30.

Niini nga tuig sa pag-alagad, gi-release sa atong organisasyon ang New World Translation of the Holy Scriptures, sa tibuok o bahin lang niini, diha sa 36 ka pinulongan. Tungod sa mga restriksiyon sa COVID-19, daghan niini ang gi-release sa elektronikong paagi panahon sa virtual nga mga miting. Ang New World Translation mabatonan na karon sa tibuok o bahin lang niini diha sa 193 ka pinulongan.

Sugod sa Marso 18, 2020, ang mga membro sa Nagamandong Lawas naghatag ug espesyal nga binulang programa bahin sa pandemic nga makita diha sa jw.org ug sa JW Library app.

Sa unang update, si Brader Stephen Lett miingon nga bisag ang pandemic makapa-stress, kini naghatag ug lig-ong ebidensiya nga “kita nagkinabuhi sa kataposang bahin sa kataposang mga adlaw. Dili gyod nâ malalis, nia na ta sa kataposang bahin sa kataposang bahin sa kataposang mga adlaw!”

Pero bisag lisod kaayo ning panahona, si Brader Lett miingon: “Ingong katawhan ni Jehova, dili ta kinahanglang matarantar.”

Ang matag update dunay makapalig-ong mga report gikan sa tibuok kalibotan. Kini nga mga report nagpakita nga maayo gyod ang pagsunod sa giya sa Nagamandong Lawas. Sa daghang higayon, ang mga opisyales sa gobyerno nakadayeg sa atong panag-igsoonay tungod sa atong paspas ug maalamong aksiyon maylabot sa pandemic.

Sa daghan nang katuigan, ang mga Saksi ni Jehova magtigom para sa tinuig nga selebrasyon sa Panihapon sa Ginoo. Niining tuiga, sa daghang dapit, ang pagpahigayog mga tigom dili maalamon o wala itugot. Tungod niini, ang mga indibiduwal ug mga pamilya nag-andam ug ilang kaugalingong mga emblema sa Memoryal ug nagtan-aw sa pakigpulong sa Memoryal pinaagig videoconferencing.

Sa ubang lugar, dili posible ang videoconferencing. Mao ni ang kahimtang sa 11 ka sangang buhatan sa Africa. Kini nga mga sangang buhatan naghimog kahikayan nga ang programa sa Memoryal i-broadcast diha sa TV ug radyo. Busa nakapaminaw sa programa ang kapig 407,000 ka magmamantala ug ang wala maihap nga gidaghanon sa interesadong mga tawo.

Giaprobahan sa Nagamandong Lawas ang pipila ka sangang buhatan sa pag-broadcast sa mga tigom sa kongregasyon diha sa TV ug radyo, parehas sa gihimo sa Memoryal. Tungod niini, ang mga magmamantala sa pobreng mga nasod nakapaminaw sa ilang senemanang mga tigom sa kongregasyon diha sa radyo ug TV. Sa pagkakaron, 23 ka sangang buhatan ang naghimo niini nga kahikayan, apil ang naa sa Africa, Europe, North America, ug South America.

Tungod sa mga epekto sa COVID-19 nga pandemic, daghan sa atong mga igsoon ang naglisod sa pagtagana sa ilang pangunang mga panginahanglan. Kapig 400 ka Disaster Relief Committee ang giporma sa tibuok kalibotan aron motabang sa mga igsoon kansang pangunang mga panginahanglan dili matagana diha sa ilang lugar. Sa 2020 nga tuig sa pag-alagad, giaprobahan sa Nagamandong Lawas ang kapig $18 milyon nga hinabang sa COVID-19 nga pandemic aron tabangan ang kapig 330,000 ka magmamantala.

Sa pinakaunang higayon, ang rehiyonal nga kombensiyon gihimo sa virtual nga paagi. Girekord ang tibuok programa sa kombensiyon diin ang mga membro sa Nagamandong Lawas ug ang ilang mga katabang maoy naghatag sa tanang bahin. Dayon, kini nga mga video gihubad sa kapig 500 ka pinulongan. Ang programa sa kombensiyon gi-post diha sa jw.org ug sa JW Library app aron matan-aw ni nga luwas sa mga magmamantala ug mga interesado diha sa ilang balay.

Gawas pa sa pandemic, ang mga igsoon sa lainlaing lugar nakaatubang ug nagkagrabeng paglutos.

Sa milabayng tuig didto sa Russia, gi-raid sa mga awtoridad ang mga balay sa gatosan ka Saksi ug daghan kanila ang giaresto. Sa pagkakaron, 42 ka igsoon ang gipriso sa Russia ug 2 sa Crimea. Sukad nga nagpakanaog ug desisyon ang Korte Suprema sa Russia niadtong 2017, kapig 1,000 ka balay sa atong mga igsoon ang gi-raid.

Ang Eritrea ang pinakadaghag gipriso nga Saksi. Sa pagkakaron, 52 ang gipriso didto. Apil kanila si Paulos Eyasu, Isaac Mogos, ug Negede Teklemariam, kinsa gipriso sukad pa niadtong Septiyembre 17, 1994 kay midumili sila nga magsundalo tungod sa konsensiya. Duna poy 26 ka brader ug sister nga kapig 10 na ka tuig nga gipriso.

Nag-ampo ta nga magpabiling maisogon ang tanan natong gipriso nga mga igsoon. Kita nahibalo nga gipamatud-an nila ang ilang kaugalingon nga matinumanon tungod sa ilang paglahutay sa mga pagsulay.​—Pinadayag 2:10.

Sa milabayng tuig sa pag-alagad, ang mga Saksi sa tibuok kalibotan nagpamatuod sa ilang pagkamaunongon kang Jehova pinaagi sa pagpakigbahin sa alternatibong mga paagi sa pagsangyaw, pagpangitag bag-ong mga paagi sa pagdinasigay, ug pagsunod pag-ayo sa direksiyon sa Nagamandong Lawas ug sa sekular nga mga awtoridad.

Pinaagi sa ilang gipakita nga debosyon sa Diyos, gipamatud-an sa atong mga igsoon ang ilang gugma sa atong Maglalalang. Ug ang ilang pagkamaunongon makatabang nila sa paglahutay sa mas dagkong pagsulay sa umaabot.​—Santiago 1:2, 3.