Ang mga Saksi ni Jehova bag-o lang nag-release ug JW Stream–Studio, usa ka bag-ong website nga gidisenyo sa pag-broadcast ug live nga mga sirkitong asembliya kauban ang tigdumala sa sirkito sa virtual nga paagi. Niadtong Marso 6 ug 7, 2021, 340 ka programa sa sirkitong asembliya ang gipahigayon sa tibuok kalibotan pinaagi niini. Kapig 500,000 ka indibiduwal ang nakatan-aw sa programa.

Wala madugay pagsugod sa pandemic, giinstruksiyonan sa Komite sa Pagpanudlo sa Nagamandong Lawas ang Broadcasting Department sa hedkuwarter sa paghimog website nga magtugot sa mga tigdumala sa sirkito sa pag-host ug live nga mga sirkitong asembliya. Ang tuyo niini mao ang paghimog website nga magtugot sa linibo ka tawo sa pagtan-awg live sa programa.

Ang Broadcasting Department nag-asayn ug gamayng grupo sa mga igsoon sa pagtrabaho niini nga proyekto. Samtang gitrabaho ni, dunay lisod nga mga problema nga gisulbad ang maong mga igsoon.

Pananglitan, kinahanglang sayon gamiton ang website kay dili tanang igsoon suheto kaayo sa paggamit ug computer. Kinahanglang magamit sab ni bisag hinay ang Internet. Dugang pa, ang Broadcasting Department ug ang Computer Department sa hedkuwarter nagtinabangay sa pagbaton ug igong mga computer server aron makaya niini ang linibo ka tawo nga dungang mogamit sa website.

“Kulbahinam kaayo ang among asaynment sa paghimog website nga maka-host ug gatosan ka asembliya nga dungang ipahigayon,” matod ni Alex Hernandez nga nagboluntaryo sa Broadcasting Department. “Gamay ra ang among team sa mga programmer, ug kadaghanan nila miingon nga unang higayon nila ni sa paghimog website nga maka-livestream.”

Ang unang mga disenyo sa JW Stream–Studio nahuman niadtong Mayo 2020. Paglabay ug lima lang ka bulan, niadtong Oktubre 2020, gitestingan sa Broadcasting Department ang website sa tabang sa mga tigdumala sa sirkito sa unom ka nasod. Pinaagi niini, nahibaloan ug nasulbad sa Broadcasting Department ang mga problema sa website sa wala pa kini i-release. Dihay team sa 17 ka mga igsoon nga andam sa pagtabang nga masulbad ang bisan unsa nga problema panahon sa pag-release sa website sa tibuok kalibotan.

Si Alex mipadayon: “Dihang dunay problema, mohunong mi ug moampo. Dihang makakita mig solusyon, kombinsido mi nga gitabangan mi ni Jehova.”

Daghan na ang mipahayag sa ilang apresasyon niini nga website.

Si Brader Jairo Espinosa sa Colombia miingon: “Gibati namo nga tungod sa programa sa asembliya pinaagig JW Stream–Studio, napalig-on ang atong panaghiusa ug mas nasuod mi sa atong mga igsoon. Dugang pa, kay live ang programa, nakatabang ni namo nga magpokus pag-ayo sa mga pakigpulong. Di gyod mi gusto nga naa mi masayloan—panalangin gyod to!”

Si Sister Magaly Reymundo sa United States miingon: “Nahibalo ko nga parehas ra ang impormasyon sa girekord na daan nga programa, pero nalipay gyod ko nga nakita ang mga igsoon nga akong nailhan nga naghatag ug live nga mga pakigpulong.”

Sukad sa pag-release, ang JW Stream–Studio nagamit na sa pag-host ug kapig 800 ka sirkitong asembliya. Mapasalamaton ta kang Jehova sa paghatag kanato niini nga tool nga makatabang nato nga magpabiling lig-on sa espirituwal ug nahiusa sa atong mga igsoon.—Salmo 133:1.