Ang atong mga batan-on sa tibuok kalibotan naningkamot nga mapadayon ang ilang espirituwal nga mga kalihokan. Sila nangitag mga paagi nga makasangyaw ug gidasig nila ang mga isigkamagsisimba panahon sa coronavirus nga pandemic.

Sa New Zealand, ang mga tawo nagbutang ug mga dulaan, teddy bear, ug mga hulagway diha sa ilang bentana aron makita sa mga bata nga mangagi. Nakita sa mga batan-on sa lainlaing kongregasyon nga kahigayonan ni sa pagsangyaw maong naghimo silag mga displey nga nagpakita kang Caleb ug Sophia ug dunay mabasa nga “Tan-awa ko sa jw.org.”

Ang nuybe anyos nga si Emilia sa Switzerland huyang ug immune system. Iyang gisulatan ang mga namuyo sa usa ka nursing home nga dili puwedeng bisitahon. Giapilan ni Emilia ang iyang mga sulat ug drowing ni Noe ug sa arka. Siya miingon nga dihay panahon nga si Noe ug ang iyang asawa wala maggawasgawas, ug kadto nakaluwas nila. Iyang gidasig ang mga residente nga “magpabilin sa sulod, sama kang Noe.” Kon wala nay pandemic, gusto ni Emilia nga bisitahon ang maong mga residente.

Dihay mga mibalos sa mga sulat ni Emilia ug mibalos pod siyag sulat nila. Nadunggan sa usa ka reporter ang bahin kang Emilia ug iyang gi-feature siya sa usa ka artikulo sa mantalaan.

Ang batan-ong mga sister nga si Peyton ug Ella Kempf sa Ontario, Canada, padayong nakig-estorya sa ilang mga kakongregasyon panahon sa pandemic. Ang ilang papa nga si Jared miingon: “Sa among pamilyahanong pagsimba, gitabangan mi sa among mga anak nga maglista ug mga ngalan nga among kontakon.” Ang ilang mama nga si Jessica miingon: “Gusto namo silang tudloan nga importanteng pasaligan ang atong mga igsoon, pamilya, ug mga higala, nga wala namo sila kalimti.”

Ingon sab niana ang gihimo sa nuybe anyos nga si Stella ug sa iyang mama sa Colorado, U.S.A. Gikontak nila ang edarang mga igsoon sa ilang kongregasyon. Gilista nila ang ilang mga kontakon ug gitawagan ang matag usa.

Ang magsoon nga si Jonathan ug Sean McKampson, nga 12 ug 15 anyos, nag-alagad uban sa ilang mga ginikanan sa usa ka Chinese nga kongregasyon sa Arizona. Padayon silang nagsangyaw pinaagi sa paghimog mga sulat sa Chinese nga pinulongan kada buntag sa dili pa sila moeskuwela. Kay nagkat-on pa sila sa pinulongan, nagkinahanglag taas nga panahon ug paningkamot aron mahuman ang mga sulat. Pero determinado silang ipaambit ang mensahe sa Bibliya ngadto sa mga tawo nga nagsultig Chinese.

Unom ka bata ug batan-on, nga 2 hangtod 15 anyos, ang tigduawan sa usa ka nursing home sa kasadpang Michigan uban sa ilang mama ug usa ka payunir nga sister. Pero tungod sa coronavirus nga pandemic, wala na motugot ang mga awtoridad nga bisitahon ang nursing home. Karon, ang mga ginikanan nagpadalag video sa mga bata nga nangantag mga awit sa Gingharian o nagbasag mga teksto para sa mga namuyo sa nursing home. Giingnan sa usa sa mga nagtrabaho sa pasilidad ang amahan sa mga bata nga ang usa sa mga video nakapakalma sa residente nga na-depress pagkakita niini sa mga balita bahin sa mga nangamatay sa coronavirus.

Masaligon ta nga gipabilhan ni Jehova ang mga paningkamot niining mga batan-ona sa pagpakitag gugma sa isigkatawo ug sa pagdayeg Kaniya pinaagi sa pagpangitag bag-ong mga paagi sa pagsangyaw.—Salmo 148:12, 13.