Daghang kongregasyon sa tibuok kalibotan ang naggamit ug computer ug Internet sa lainlaing paagi aron makapahigayon ug mga tigom panahon sa pandemic. Pero ang ubang igsoon sa hilit nga mga lugar maglisod ug access sa Internet maong kinahanglang maningkamot sila pag-ayo aron makabenepisyo gihapon sa mga tigom, samtang nagsunod sa mga safety protocol sa COVID-19. Niay pipila ka pananglitan sa Africa.

Daghang igsoon ang walay access sa Internet, maong dili sila makagamit ug Zoom. Kada semana, ang sangang buhatan sa Malawi magpadalag mga video sa mga tigom ngadto sa mga ansiyano sa matag kongregasyon pinaagig cellphone network. Dayon ipasa sa mga ansiyano ang mga video ngadto sa mga magmamantala sa ilang kongregasyon.

Pero dili ni sayon para sa 28 ka magmamantala sa Tcharo Congregation, nga nagpuyo sa kabukiran sa amihanang bahin sa Malawi duol sa Lake Malawi. Kay nababagan man sa mga bukid ang signal sa cellphone, dunay ansiyano nga kinahanglang mobiyaheg layo aron makakuhag kusog nga signal. Dayon, ang ansiyano mobalik sa kabukiran ug magbaktas agi sa mga bukid hangtod makaabot duol sa matag balay sa mga Saksi aron ipasa ang mga video pinaagig Bluetooth.

Di pa dugay, nadiskobrehan sa mga ansiyano nga makakuha silag mas kusogkusog nga signal nga dili ra kaayo layo—sa Lake Malawi. Mosakay silag baroto didto sa lanaw, nga distansiya sa bukid, aron maka-download ug mga video. Tungod niini, dili na kinahanglang mobiyaheg layo kaayo ang mga ansiyano.

Aron “makaduaw” sa mga kongregasyon sa hilit nga mga lugar sa amihanan-kasadpang bahin sa Mozambique, ang mga tigdumala sa sirkito mopakigpulong pinaagig cellphone. Sagad dili posible ang conference call, maong ang mga tigdumala sa sirkito mopakigpulong gamit ang daghang cellphone nga giplastar sa ilang atubangan. Ang kada cellphone nakakonektar sa lainlaing panimalay sa mga igsoon.

Ang ubang magmamantala nagpuyo sa hilit kaayong mga lugar maong walay signal sa cellphone duol sa ilang balay. Kon eskedyul sa tigom, ang mga igsoon moagi sa kalibonan hangtod makakuha silag signal. Kon naa nay signal, manglingkod na sila ug maminaw sa tigom.

Si Brader Yohane Vinho, tigdumala sa sirkito didto, miingon nga “daghang igsoon ang naningkamot pag-ayo aron makabenepisyo sa mga tigom,” ug nakatabang ni nila nga magpabiling lig-on sa espirituwal bisag naa sa hilit nga mga lugar. Ang laing tigdumala sa sirkito nga si Brader Carlos Cortazão miingon: “Morag kauban ra gihapon namo ang mga igsoon sa Kingdom Hall. Mokomento mi ug manganta uban nila. Nakita gyod namo nga ginapakaon ni Jehova sa espirituwal ang iyang katawhan niining panahon sa pandemic.”—Juan 21:17.