Tungod kay nameligro ang mga edaran nga mataptan ug coronavirus, ang atong minahal nga mga edarang igsoon misunod gyod sa mga rekomendasyon sa mga awtoridad nga magpabilin lang sa balay. Pero wala kana magpasabot nga wala ra silay ginahimo. Naggamit silag lainlaing teknolohiya aron makapakigbahin sa tigom ug ministeryo.

Sa Rome, Italy, usa ka 94 anyos nga sister, nga nabawtismohan niadtong 1952, ang dili na makagawasgawas sa balay bisan niadtong wala pay pandemic. Nagatan-aw siyag mga tigom sa JW Stream pero dugaydugay na siyang wala makatambong sa ilang tigom. Pero karon nga gihikay sa mga ansiyano nga ipahigayon ang mga tigom pinaagig videoconference, makita na niya ang tanan niyang kakongregasyon ug makatambong na siya sa ilang tigom.

Sa Spanish Fork, Utah, U.S.A., ang amang nga sister nga si Stephanie Aitken nagpuyo sa usa ka nursing home. Sa pagkakaron, ang maong nursing home dili modawat ug bisita. Gitabangan sa usa ka ansiyano ug sa iyang asawa ang maong sister nga mag-install ug app para sa videoconference diha sa iyang gadyet. Gisenyas sa magtiayon ang mga instruksiyon samtang tua sila sa gawas sa pasilidad, ug kay bildo ang entrada niini makita sila sa maong sister. Paghuman ug install sa app, gigakos sa sister ang iyang tablet. Mapasalamaton siya nga makakomunikar na siya sa iyang mga kakongregasyon.

Gigamit sa mga igsoon sa tibuok kalibotan, lakip sa mga edaran, ang teknolohiya aron maka-adjust sa lisod nga mga kahimtang nga resulta niini nga pandemic. Kini nagpahinumdom nato sa saad ni Jehova nga ang iyang katawhan maalamong maggamit sa “gatas sa kanasoran.” (Isaias 60:16) Nasayod ta nga kanunay siyang magtagana sa panginahanglan sa iyang mga alagad dinhi sa yuta panahon sa kalisdanan.