Niadtong Agosto 2, 2024, gi-release ni Brader Carlos Hortelão, membro sa Komite sa Sangang Buhatan sa Angola, ang Bag-ong Kalibotang Hubad sa Kristohanon Gregong Kasulatan ug ang mga basahon sa Bibliya nga Genesis, Ruth, Ester, ug Jonas sa pinulongang Ibinda. Gipahibalo ni sa unang adlaw sa 2024 “Ipahayag ang Maayong Balita!” Rehiyonal nga Kombensiyon sa Cabinda, Angola. Sa katibuk-an, 953 ang mitambong sa programa. Kadtong nanambong nakadawat ug printed nga kopya sa Bag-ong Kalibotang Hubad sa Kristohanon Gregong Kasulatan. Ang Kristohanon Gregong Kasulatan ug ang mga basahon sa Hebreohanong Kasulatan ma-download na dayon sa jw.org ug sa JW Library app.

Kapig 716,000 ka tawo nga makasultig Ibinda ang nagpuyo sa Angola. Kini ang pinakaunang hubad sa Bibliya sa pinulongang Ibinda. Nalipay kaayo ang 335 ka igsoon diha sa 13 ka Ibinda nga kongregasyon ug ang usa ka grupo sa nasod kay naa na silay Bibliya sa ilang kaugalingong pinulongan.

Niadtong Agosto 9, 2024, gi-release ni Brader Energy Matanda, membro sa Komite sa Sangang Buhatan sa Zimbabwe, ang Bag-ong Kalibotang Hubad sa Kristohanon Gregong Kasulatan sa Zimbabwe Sign Language panahon sa 2024 “Ipahayag ang Maayong Balita!” Rehiyonal nga Kombensiyon sa Harare, Zimbabwe. Tanantanan, 405 ang mitambong sa programa. Ma-download na dayon ni diha sa jw.org ug sa JW Library Sign Language app.

Ang basahon sa Mateo gi-release sa Zimbabwe Sign Language niadtong 2021. Sukad niadto, anam-anam nga gidugang ang ubang basahon sa Kristohanon Gregong Kasulatan. Gibanabana nga mga usa ka milyong tawo ang naggamit ug Zimbabwe Sign Language, apil ang 377 ka igsoon diha sa 11 ka sign language nga kongregasyon ug 11 ka grupo sa tibuok Zimbabwe.

Niadtong Agosto 11, 2024, gipahibalo ni Brader Mark Sanderson, membro sa Nagamandong Lawas, ang pagrebisar sa Bag-ong Kalibotang Hubad sa Balaang Kasulatan sa Bulgarian ug iyang gi-release ang mga basahon sa Bibliya nga Mateo, Marcos, ug Lucas panahon sa kataposang pakigpulong sa 2024 “Ipahayag ang Maayong Balita!” Espesyal nga Kombensiyon sa Sofia, Bulgaria. Tanantanan, 5,418 ang nanambong. Kining tulo ka basahon ma-download na dayon sa jw.org ug sa JW Library app.

Ang Bag-ong Kalibotang Hubad sa Balaang Kasulatan unang gi-release sa Bulgarian niadtong 2009. Karon, halos 3,000 ka igsoon ang nag-alagad sa 57 ka kongregasyon sa tibuok Bulgaria.

Niadtong Agosto 16, 2024, gi-release ni Brader Bois Sylvain, membro sa Komite sa Sangang Buhatan sa West Africa, ang mga basahon sa Bibliya nga Mateo ug Marcos sa pinulongan nga Aja panahon sa 2024 “Ipahayag ang Maayong Balita!” Rehiyonal nga Kombensiyon sa Djakotomey, Benin. Ang release gipahibalo ngadto sa 631 nga nanambong. Naa poy 435 nga naka-tie in sa pakigpulong via videoconference gikan sa Assembly Hall sa Abomey-Calavi, Benin. Ang duha ka basahon ma-download na dayon sa jw.org ug sa JW Library app.

Kapig 1.2 ka milyong tawo sa Benin ug Togo ang nagsultig Aja. Naa pay laing duha ka hubad sa Kristohanon Gregong Kasulatan nga available sa pinulongang Aja. Pero lisod ning mabatonan, ug naggamit nig mga pulong nga lisod sabton sa kadaghanang magbabasa. Dugang pa, gitangtang sa maong mga hubad ang personal nga ngalan sa Diyos nga Jehova. Karon, halos 1,300 ka igsoon ang nag-alagad sa 25 ka Aja nga kongregasyon ug usa ka grupo sa Benin, apil pod ang 12 ka kongregasyon ug 2 ka grupo sa Togo. Silang tanan eksayted nga makabaton ug daling masabtan nga hubad nga nagpasig-uli sa balaang ngalan sa hustong dapit niini.

Niadtong Agosto 16, 2024, gi-release ni Brader Jeffrey Winder, membro sa Nagamandong Lawas, ang rebisadong Bag-ong Kalibotang Hubad sa Balaang Kasulatan sa Kinyarwanda. Gipahibalo ni Brader Winder ang release sa unang adlaw sa 2024 “Ipahayag ang Maayong Balita!” Rehiyonal nga Kombensiyon sa Kigali, Rwanda. Naay 9,908 nga nanambong. Naa poy 1,141 nga naka-tie in sa programa gikan sa laing duha pa ka kombensiyonanan. Ang mga nanambong niini nga mga lokasyon nakadawat ug printed nga kopya sa Bibliya. Ang mga audio recording ug digital edition sa rebisadong Bag-ong Kalibotang Hubad sa Kinyarwanda ma-download na pod dayon sa jw.org ug sa JW Library app.

Kapig 13 ka milyong tawo nga nagsultig Kinyarwanda ang nagpuyo sa Rwanda. Gigamit pod ang Kinyarwanda sa ubang nasod, sama sa Democratic Republic of the Congo, Tanzania, ug Uganda. Ang kompletong Bag-ong Kalibotang Hubad sa Balaang Kasulatan unang gi-release sa Kinyarwanda niadtong 2010. Sa pagkakaron, kapig 35,500 ka igsoon ang nag-alagad sa 634 ka Kinyarwanda nga kongregasyon sa tibuok Rwanda.

Niadtong Agosto 16, 2024, gi-release ni Brader David Splane, membro sa Nagamandong Lawas, ang rebisadong Bag-ong Kalibotang Hubad sa Balaang Kasulatan sa Sinhala ngadto sa 4,273 nga nanambong sa unang adlaw sa 2024 “Ipahayag ang Maayong Balita!” Rehiyonal nga Kombensiyon sa Colombo, Sri Lanka. Naa poy 1,045 nga nanambong sa rehiyonal nga kombensiyon sa siyudad sa Chilaw, Sri Lanka, nga naka-tie in sa programa via videoconference. Ang mga nanambong sa maong duha ka lokasyon nakadawat ug printed nga kopya sa Bag-ong Kalibotang Hubad sa Sinhala. Ma-download na pod dayon ang digital format sa jw.org ug sa JW Library app.

Kapig 75 ka tuig na ang milabay sukad gisugdan sa mga Saksi ni Jehova ug hubad ang mga literatura sa Bibliya ngadto sa Sinhala. Karon, kapig 15 ka milyong tawo ang nagsultig Sinhala nga nagpuyo sa Sri Lanka, apil na ang 4,808 ka igsoon nga nag-alagad sa 62 ka Sinhala nga kongregasyon didto.

Niadtong Agosto 30, 2024, gi-release ni Brader Martin Décousus, membro sa Komite sa Sangang Buhatan sa New Caledonia, ang kompletong Bag-ong Kalibotang Hubad sa Balaang Kasulatan sa Wallisian panahon sa 2024 “Ipahayag ang Maayong Balita!” Rehiyonal nga Kombensiyon. Ang programa sa kombensiyon gihimo sa siyudad sa Nouméa, New Caledonia, ug sa baryo sa Mala’e, Wallis and Futuna. Kini nga mga lokasyon gikonektar sa usag usa via videoconference. Ang tanang 317 nga nanambong nakadawat ug printed nga kopya sa Bag-ong Kalibotang Hubad. Ang Bibliya ma-download na pod dayon sa jw.org ug sa JW Library app.

Ang Bag-ong Kalibotang Hubad sa Kristohanon Gregong Kasulatan gi-release sa Wallisian niadtong 2018. Ang 153 ka igsoon nga nagsultig Wallisian nga nag-alagad sa duha ka kongregasyon sa New Caledonia ug sa Wallis and Futuna eksayted nga mogamit sa kompletong Bag-ong Kalibotang Hubad sa pagsangyaw sa maayong balita diha sa kapig 35,000 ka tawo nga nagsultig Wallisian nga nagpuyo niining mga lugara.