Niadtong Sabado, Oktubre 5, 2019, ang Watch Tower Bible and Tract Society of Pennsylvania may gihimong tinuig nga business meeting sa Assembly Hall sa mga Saksi ni Jehova sa Newburgh, New York, U.S.A. Human sa business meeting, ang Nagamandong Lawas nagpresentar ug makapadasig nga espirituwal nga programa sa 20,679 ka mamiminaw, apil na sa mga nakakonektar pinaagig internet. Ang mosunod maoy sumaryo sa matag pakigpulong. *

Si Brader Gerrit Lösch, ang tsirman sa maong programa, naghatag sa pangbukas nga pakigpulong base sa Mateo 23:10, nga nagpahinumdom kanato nga si Jesu-Kristo ang atong lider, dili si bisan kinsang tawo.

Si Brader Stephen Lett nagpatin-aw sa kaimportante sa paghatag nga malipayon. Ang usa ka paagi nga ikapakita nato ang atong pagkamahinatagon mao ang pagsuportar sa pagpanghatag ug hinabang. Naghatag si Brader Lett ug sumaryo sa nahimong epekto sa kalamidad ug kon unsay nahatag nga tabang sulod sa 2018 ug 2019 nga tuig sa pag-alagad. Kapig 900,000 ka igsoon ang naapektohan sa mga trahedya; kapig 700 ka Kingdom Hall ug 15,000 ka balay sa mga igsoon ang nadaot o naguba pag-ayo. Ang mga Saksi ni Jehova migastog $49.5 ka milyon sa pagpanghatag ug hinabang.

Niini nga pakigpulong, naay gipakitang mga video bahin sa kinasingkasing nga pagpasalamat sa mga igsoon nga nakadawat ug hinabang.

Gipatin-aw niini nga video nga ang mga Saksi ni Jehova nagmentinar ug halos 80,000 ka bilding sa tibuok kalibotan. Gipasiugda sab niini kon giunsa nato pagmentinar, pag-renovate, ug pagtukod ang atong mga pasilidad.

Kini nga video naay archived interview kang Brader Max Larson, George Couch, ug Gilbert Nazaroff, nga mitabang kaniadto sa pagpili ug pagpalit ug mga propidad para sa sangang buhatan sa United States ug sa tibuok kalibotang hedkuwarter. Gisaysay niining tulo ka brader kon giunsa ta pagtabang ni Jehova nga mapalit ang lainlaing propidad.

Gipahibalo niini nga video ang plano sa mga Saksi ni Jehova nga tapoon ang media production sa bag-ong pasilidad nga tukoron sa Ramapo, New York. Kini nga propidad maoy 3 kilometros gikan sa hedkuwarter sa Warwick, New York. Ang pagtukod giplanong sugdan sa 2022 ug humanon sa Disyembre 2026. Dihang todo na ang pagtukod, gibanabana nga 1,500 ka boluntaryo ang gikinahanglan kada adlaw.

Giingon sa video nga sugod sa Enero 2020, ang mga magmamantala nga interesado nga mohimog dugang sa ilang ministeryo makapil-ap ug aplikasyon sa jw.org ug maka-submit niini sa ilang mga ansiyano para ma-review.

Ang pipila ka audio sa jw.org ma-access na gamit ang Amazon Alexa o Google Assistant.

Gipatin-aw ni Brader David Splane ang bag-ong pagsabot sa tagna sa Joel kapitulo 2 bahin sa dakong panon sa mga dulon. Eksayted ta nga tun-an kining bag-ong pagsabot dihang mogawas kini sa Bantayanang Torre.

Gihisgotan ni Brader Samuel Herd ang mga kaayohan kon atong gamiton ang New World Translation of the Holy Scriptures (Study Edition) nga ma-access online. Dayon iyang gi-release ang inimprentang New World Translation of the Holy Scriptures (Study Edition) gikan sa basahong Mateo hangtod Buhat. Ang mga magmamantala maka-request ug kopya niini pinaagi sa ilang kongregasyon.

Gipasiugda ni Brader Anthony Morris nga para sa tinuod nga mga Kristohanon, ang pagsangyaw sa maayong balita mao ang pinakaimportanteng asaynment. Ang atong mga pasilidad nagsuportar sa Nagamandong Lawas sa pag-organisar sa buluhatong pagsangyaw ug sa pagtaganag espirituwal nga pagkaon sa katawhan ni Jehova. Gihisgotan ni Brader Morris ang makapadasig nga mga pulong gikan sa Nobyembre 15, 1976 nga Watchtower: “Pag-abot sa ‘dakong kasakitan,’ ang buluhatong pagsangyaw naa na sa iyang kinatayuktokan nga pagbuylo nga wala pa mahitabo sukad sa tibuok kalibotan. Ang pag-abot ni Ginoong Jesus sa pagpahamtang ug silot kalit nga moabot nga makurat bisan ang katawhan ni Jehova, kay nianang panahona busy kaayo sila sa pagbuhat sa kabubut-on ni Jehova!”

Gisaysay ni Brader Mark Sanderson nga dahomon sa katawhan sa Diyos nga dumtan sila sa “tanang kanasoran,” sumala sa gitagna ni Jesus. (Mateo 24:9) Pero gidasig ta ni Brader Sanderson nga dili mahadlok sa tawo, kondili kang Jehova.​—Salmo 111:10.

Gipakita sab ang usa ka makapatandog nga video bahin sa gilutos nga mga igsoon sa Russia nga nagsaysay kon giunsa nila pagwala ang ilang kahadlok sa paglutos. Kini nga pakigpulong ug video nagdasig sa tanang alagad ni Jehova nga ugmaron ang samang panghunahuna.

Gihisgotan ni Brader Geoffrey Jackson kon unsaon nato pagpadapat ang mga teksto sa Kristohanon Gregong Kasulatan nga naggamit sa termino nga literal nga nagkahulogang “bug-os nga nahuwasan.” Gipasiugda sab niya nga importante nga padayon natong ‘huptan ang maayong panghunahuna’ niining kataposang mga adlaw.​—1 Pedro 1:13.

Gipahibalo ni Brader Kenneth Cook ang tinuig nga teksto sa 2020, ang Mateo 28:19: ‘Adtoa ninyo ang mga tawo ug tudloi sila aron mahimong akong mga tinun-an. Bawtismohi sila.’ Gipasiugda niya nga kinahanglan natong tabangan ang mga interesado nga magpahinungod sa ilang kinabuhi kang Jehova ug magpabawtismo.

Ang espirituwal nga mga programa sama sa tinuig nga miting magdasig kanato nga padayong himoon ang atong maarangan sa pag-alagad kang Jehova.