Niadtong Hunyo 9, 2024, gi-release ni Brader Jeffrey Winder, membro sa Nagamandong Lawas, ang mga basahon sa Bibliya nga Mateo ug Marcos sa Guadeloupean Creole panahon sa kataposang pakigpulong sa 2024 “Ipahayag ang Maayong Balita!” Espesyal nga Kombensiyon sa Baie-Mahault, Guadeloupe. Sa katibuk-an, 8,602 ang nanambong sa kombensiyon. Ug naa poy 5,588 nga mitan-aw sa programa pinaagig videoconference. Ang mga nanambong nakadawat ug printed nga kopya sa The Bible—The Good News According to Matthew. Ang maong mga basahon sa Bibliya ma-download na dayon sa jw.org ug sa JW Library app.

Kapin sa 300,000 ka tawo sa Guadeloupe ug 200,000 sa France ang makasultig Guadeloupean Creole. Karon, mga 3,300 ka igsoon nga makasultig Guadeloupean Creole ang nag-alagad sa 42 ka kongregasyon sa Guadeloupe ug naa poy 80 ka igsoon nga nag-alagad sa 2 ka grupo sa France.

Niadtong Hunyo 28, 2024, gi-release ni Brader Geoffrey Jackson, membro sa Nagamandong Lawas, ang rebisadong Bag-ong Kalibotang Hubad sa Balaang Kasulatan sa Armenian. a Gipahibalo ni sa unang adlaw sa 2024 “Ipahayag ang Maayong Balita!” Rehiyonal nga Kombensiyon nga gihimo duol sa Yerevan, Armenia. Sa katibuk-an, 6,155 ang nanambong. Nahimo dayong available ang digital format sa rebisadong Armenian nga Bag-ong Kalibotang Hubad sa jw.org ug sa JW Library app. Ang printed nga kopya mahimong available sa ulahing bahin sa 2024.

Ang unang Armenian nga Bibliya nabatonan niadtong ikalimang siglo C.E. Ang kompletong Bag-ong Kalibotang Hubad sa Balaang Kasulatan sa Armenian unang gi-release niadtong 2010. Karon, mga tulo ka milyon ka tawo nga nagsulti ug Armenian ang nagpuyo sa Armenia, apil ang mga 10,550 ka igsoon nga nag-alagad sa 117 ka kongregasyon. Naa poy 5,200 ka igsoon ang nag-alagad sa mga Armenian nga kongregasyon ug grupo sa Europe ug sa United States.

Niadtong Hunyo 28, 2024, gi-release ni Brader Freeman Abbey, membro sa Komite sa Sangang Buhatan sa Ghana, ang basahon sa Mateo sa Fante nga pinulongan panahon sa programa sa 2024 “Ipahayag ang Maayong Balita!” Rehiyonal nga Kombensiyon nga gihimo sa Takoradi Assembly Hall sa Sekondi-Takoradi, Ghana. Naay 1,230 ka igsoon nga mitambong sa programa. Naa poy 2,022 nga mitan-aw sa programa pinaagig videoconference. Ang mga nanambong nakadawat ug printed nga kopya sa The Bible—The Good News According to Matthew. Nahimo pod dayong available ang digital format niini sa jw.org ug sa JW Library app.

Gibanabana nga unom ka milyon ka tawo ang makasultig Fante. Naporma ang unang Fante ug pinulongan nga kongregasyon sa gitawag karon ug Sekondi-Takoradi, Ghana, niadtong Septiyembre 1935. Karon, mga 9,700 ka igsoon nga makasultig Fante ang nag-alagad sa 158 ka kongregasyon sa Ghana.

Niadtong Hunyo 28, 2024, gi-release ni Brader David Splane, membro sa Nagamandong Lawas, ang kompletong Bag-ong Kalibotang Hubad sa Balaang Kasulatan sa Icelandic sa 1,312 nga nanambong sa unang adlaw sa 2024 “Ipahayag ang Maayong Balita!” Espesyal nga Kombensiyon sa Reykjavík, Iceland. Ang mga nanambong nakadawat ug printed nga kopya sa Bag-ong Kalibotang Hubad. Nahimo pod dayong available ang digital format diha sa jw.org ug sa JW Library app.

Niadtong 2019, nadawat sa atong mga igsoon ang Bag-ong Kalibotang Hubad sa Kristohanon Gregong Kasulatan sa Icelandic. Nalipay ang 395 ka igsoon nga makasultig Icelandic nga nag-alagad sa lima ka kongregasyon nga nadawat nila ang kompletong Bag-ong Kalibotang Hubad nga magamit nila sa pagministeryo niini nga isla nga naay mga 390,000 ka molupyo.

Niadtong Hunyo 28, 2024, gi-release ni Brader Johannes De Jager, membro sa Komite sa Sangang Buhatan sa Angola, ang mga basahon sa Mateo, Lucas, ug Buhat sa Ngangela. Gipahibalo ang pag-release ngadto sa 450 nga nanambong sa 2024 “Ipahayag ang Maayong Balita!” Rehiyonal nga Kombensiyon sa Menongue, Angola. Ang mga nanambong nakadawat ug printed nga kopya sa The Bible—The Good News According to Matthew. Nahimo pod dayong available ang tulo ka basahon sa digital format diha sa jw.org ug sa JW Library app.

Mga usa ka milyon ka tawo nga makasultig Ngangela ang nagpuyo sa Angola. Naporma ang unang Ngangela nga kongregasyon niadtong 2011. Karon, 260 ka igsoon ang nag-alagad sa walo ka Ngangela nga kongregasyon ug grupo sa Angola ug Namibia.

Niadtong Hunyo 30, 2024, gi-release ni Brader Carlos Martinez, membro sa Komite sa Sangang Buhatan sa Central America, ang The Bible—The Good News According to Matthew sa Ngabere panahon sa prerecorded nga programa nga gi-stream sa daghang Kingdom Hall sa Costa Rica ug Panama. Ang 2,032 nga nanambong niini nga mga lokasyon nakadawat ug printed nga kopya sa basahon sa Mateo human sa pahibalo. Nahimo pod dayong available ang digital format diha sa jw.org ug sa JW Library app.

Karon, mga 216,000 ka tawo nga makasultig Ngabere ang nagpuyo sa Costa Rica ug Panama. Ang atong 877 ka igsoon nga makasultig Ngabere nag-alagad sa 26 ka kongregasyon ug 2 ka grupo niana nga mga nasod.