NEW YORK—Niadtong Mayo 19, 2017, gisugdan sa mga Saksi ni Jehova ang ilang tinuig nga tulo ka adlaw nga mga kombensiyon nga may tema nga “Padayon sa Paglahutay!” Ang programa himoon sa piniling mga dapit sa tibuok kalibotan ug magpadayon hangtod sa Enero 2018. Sama sa miaging mga tuig, personal nga giimbitar sa mga Saksi sa tibuok kalibotan ang publiko sa pagtambong sa ilang mga kombensiyon.

Walay bayad ang pagtambong ug walay pagpangolekta nga himoon. “Sa miaging tuig, duolag 13 ka milyon ang mitambong sa among mga kombensiyon sa tibuok kalibotan,” matod ni David A. Semonian, tigpamaba sa mga Saksi ni Jehova sa ilang world headquarters sa Warwick, New York. “Nanghinaot ming mas daghan ang motambong karong tuiga.”

Ang programa dunay 52 ka bahin ug ipresentar sa lainlaing format, apil ang mugbong pakigpulong, interbiyo, ug mugbong video. Dugang pa, dunay tulo ka bahin nga pelikula nga nag-ulohang Hinumdomi ang Asawa ni Lot ang ipasalida kada hapon. Ang mga petsa ug lokasyon sa matag kombensiyon makita sa opisyal nga website sa mga Saksi, ang jw.org. Ang mga taga-media mahimong mokontak sa kinadul-ang branch office sa mga Saksi ni Jehova alang sa dugang impormasyon, lakip ang ngalan sa local media contact para sa mga reporter nga gustong mohimog report sa kombensiyon.

“Ang mga problema sa kinabuhi mahimong makapabalaka pag-ayo kanato ug dili na ta ganahang mopadayon o kaha mosurender na,” matod ni Mr. Semonian. “Ang among kombensiyon niining tuiga makabenepisyo sa mga Saksi ug mga dili Saksi kay hisgotan niini ang mga punto nga makadasig sa paglahutay ug sa pagsagubang nga malamposon sa mga problema.”

Media Contact:

David A. Semonian, Office of Public Information, +1-845-524-3000