Ang tibuok kalibotang hedkuwarter sa mga Saksi ni Jehova nagmonitor pag-ayo sa pagkaylap sa sakit nga novel coronavirus (nga nailhang COVID-19). Nahibalo ta pinaagi sa tagna sa Bibliya nga dunay pagkaylap sa mga sakit panahon sa kataposang mga adlaw. (Lucas 21:11) Dihang mokaylap ang usa ka sakit, maalamon nga panalipdan ang kaugalingon ug ang uban.​—Proverbio 22:3.

Ang uban naghunahuna kon unsa nay kahimtang sa atong mga igsoon sa apektadong mga lugar. Ang pagkaylap sa COVID-19 nakaapektar ug dako sa mga sangang buhatan ug kongregasyon sa Italy, Japan, South Korea, ug ubang nasod. Sa pipila ka kahimtang, gikanselar sa sangang buhatan ang mga tour ug wala usa kini magpasulod ug mga bisita. Sa ubang kahimtang, gidili sa gobyerno ang dagkong panagkatigom mao nga gikanselar sa sangang buhatan ang mga sirkitong asembliya. Dugang pa, kinahanglang i-adjust sa mga kongregasyon ang ilang ministeryo ug mga tigom sa pipila ka dapit. Bisan pa niini, padayong gipalig-on sa atong mga igsoon ang ilang espirituwalidad ug nagdinasigay sila sa usag usa.​—Judas 20, 21.

Niini nga mga kahimtang, nakita sa atong mga igsoon nga makatabang ang mosunod nga mga prinsipyo. Kini makatabang sab nimo ug sa imong pamilya kon dunay pagkaylap sa sakit sa inyong lugar.

• Ayawg Katarantar. Maayong mag-amping ta kon dunay pagkaylap sa sakit ug mohimog mga paagi aron malikayan kini. Pero kinahanglang dili ta matarantar tungod sa kahadlok.​—Proverbio 14:15; Isaias 30:15.

• Sunda ang mga Instruksiyon sa Gobyerno. Ang lokal nga mga awtoridad sagad magpagawas ug mga pahimangno ug restriksiyon aron mapanalipdan ang mga tawo. Kinahanglang mahibalo ta sa mga direktiba sa gobyerno ug sundon kini.​—Roma 13:1.

• Magpabiling Hinlo. Importante nga manghunaw gamit ang tubig ug sabon o mogamit ug sanitizer nga may alcohol. Kinahanglan sab nga ipabiling limpiyo ang mga butang nga kanunayng hawiran diha sa atong balay ug Kingdom Hall. Dugang pa, wala idasig sa mga medical expert ang pagpakiglamano, kay mahimong hinungdan ni nga mapasa ang sakit. Kon bahin sa coronavirus, ang World Health Organization nagtaganag dugang nga impormasyon para sa publiko.

• Magpakitag Gugma sa Isigkatawo. Nahibalo ta nga importante ang pagtambong sa tigom ug pagpakigbahin sa publikong pagsangyaw. Pero kon nasakit ta, maayong magpabilin na lang ta sa balay aron dili ta makatakod sa uban. Kini nagpakitag inigsoong gugma ug manalipod sa atong mga igsoon ug sa mga dili Saksi nga atong makauban.—Mateo 22:39.

• Sunda ang Temporaryong mga Kabag-ohan sa mga Kahikayan sa Kongregasyon. Sa mga lugar nga dunay pagkaylap sa sakit, mahimong moingon ang sangang buhatan nga temporaryong ikanselar ang mga tigom sa kongregasyon, asembliya, ug ubang espesyal nga panagkatigom. Mao niy kahimtang sa ubang dapit diin grabe ang pagkaylap sa COVID-19 virus, sama sa mga rehiyon sa Italy, Japan, ug South Korea. Depende sa lokal nga mga kahimtang, mahimong hatagan sa mga ansiyano ug access sa girekord nga mga tigom ang mga magmamantala aron matan-aw nila kini sa ilang balay. Ang mga magmamantala mahimong makapakigbahin sa ministeryo pinaagig tawag, text, e-mail, o sulat.

Mabasa sa mosunod nga mga reperensiya ang makatabang nga mga prinsipyo aron malikayan ang sakit.

• “Proteksiyoni ang Imong Kaugalingon Batok sa Sakit” Pagmata! Num. 6 2016, panid 4-6

• “Mga Paagi sa Pagpahimsog” Pagmata! Hunyo 2015, panid 2-7

• “Makabaton Kag Mas Maayong Panglawas: Sugyot 4—Ampingi ang Imong Lawas” Pagmata! Marso 2011, panid 7