NEW YORK—Ang mga Saksi ni Jehova nagsugod na sa pagdapit sa publiko sa pagtambong sa dagkong mga tigom nga ilang himoon sa tuig 2017.

Sa Martes, Abril 11, 2017, ang mga Saksi sa tibuok kalibotan nagdapit sa publiko sa pagtambong sa ilang tinuig nga paghandom sa Panihapon sa Ginoo, nga gitawag usab nga Memoryal sa kamatayon ni Kristo. Naghimo silag espesyal nga kampanya, nga magsugod sa Sabado, Marso 18, 2017, ug matapos sa Abril 11, 2017, aron personal nga madapit ang mga tawo, nga nanghatag ug inimprentang mga imbitasyon nga may mga detalye kon asa kini himoon sa lokal nga dapit. Kini giisip sa mga Saksi ni Jehova ingong labing importanteng okasyon sa tibuok tuig.

Dugang pa sa ilang pagsaulog sa Memoryal, ang mga Saksi nagdapit sa publiko sa pagtambong sa 30-minutos nga pakigpulong nga gibase sa Bibliya, nga may ulohang “Magmakigdaiton Niining Gubot nga Kalibotan.” Kini nga ulohan ang hisgotan sa ilang miting publiko sa Sabado, Abril 15 ug sa Dominggo, Abril 16, 2017, diha sa kadaghanang Kingdom Hall sa mga Saksi ni Jehova sa tibuok kalibotan.

Sugod sa Mayo 19, 2017, sugdan sa mga Saksi ni Jehova ang ilang tulo ka adlaw nga tinuig nga kombensiyon nga may tema nga “Padayon sa Paglahutay!” Ang mga programa magsugod sa United States ug magpadayon sa lainlaing lokasyon sa tibuok kalibotan hangtod sa unang bulan sa 2018. Sa matag kombensiyon, ang mga Saksi mohimog tulo ka semanang kampanya sa pagpanghatag ug imbitasyon ngadto sa publiko sa pagtambong niini nga okasyon diha sa ilang lugar.

Kining tanang okasyon, maingon man ang tanang tigom sa mga Saksi ni Jehova, libre. Ang mga media outlet gidapit sa pagkontak sa lokal nga branch office sa mga Saksi ni Jehova sa ilang lugar alang sa tabang kon unsay ireport bahin sa maong okasyon.

Media Contact:

David A. Semonian, Office of Public Information, +1-845-524-3000