Ang European Court of Human Rights (ECHR) nagpakanaog ug tulo ka desisyon nga pabor sa mga Saksi ni Jehova sa Ukraine niadtong Nobyembre 12, 2020. Mao ni ang mga kaso: Zagubnya and Tabachkova v. Ukraine, Migoryanu and Others v. Ukraine, ug Kornilova v. Ukraine. Kini nga mga kaso gipasaka sa Korte niadtong 2014 ug 2015. Ang matag kaso naglangkit sa mga opisyales sa kapolisan kinsa wala magsilot niadtong way kaluoy nga miatake sa mga Saksi ni Jehova. Ang ECHR mihukom nga ang mga awtoridad sa Ukraine wala mohimog bug-os nga pagpanalipod sa katungod sa atong mga igsoon, ug mimando kini nga ang mga biktima hatagag $17,400 U.S. ingong danyos.

Zagubnya and Tabachkova v. Ukraine: Niadtong Abril 20, 2009, si Sister Zagubnya ug Sister Tabachkova nagsangyaw sa balay ug balay sa baryo sa Novi Mlyny. Dihang ang usa ka pari sa Trinity Orthodox Church nga si Mykola Lysenko nakakita sa atong mga sister sa dalan, iya silang gipusposan ug kahoy sa ulo ug likod. Wala gyod siloti ang maong pari bisan pag miangkon siya nga gusto niyang “hadlokon” ang atong mga sister ug “pahunongon sa ilang buluhaton.”

Migoryanu and Others v. Ukraine: Niadtong Abril 5, 2012, dihay 21 ka Saksi ni Jehova ug pipila nila ka bisita ang nagtigom aron magsaulog sa Memoryal sa kamatayon ni Jesu-Kristo dihang usa ka bayolenteng grupo nga gipangunahan sa Orthodox nga pari nga si Mr. Greku ang mipahinabog kasamok sa maong panagkatigom. Gipamalikas ug gihulga sa maong grupo ang mga nanambong, apil na ang mga bata ug edarang mga babaye.

Sukad niadto, ang pari ug ang iyang mga kunsabo padayong miatake sa mga Saksi ni Jehova. Ilang gikulata ang atong mga igsoon, gisunog ang sakyanan sa usa ka brader, ug gilabayag hinimo nga dinamita ang balay diin naay mga Saksi nga nangatulog. Human niini nga mga insidente, ang mga biktima misumbong sa kapolisan ug mihatag ug ebidensiya sa mga awtoridad. Sa ubang insidente, makita sa mga video ang mga tawong miatake. Pero wala giila sa kapolisan nga ang mga biktima giatake tungod sa ilang relihiyon, ug miingon sab ang mga polis nga dili mailhan diha sa mga video kon kinsa ang mga miatake. Wala gyod masiloti ang pari ug ang iyang mga kunsabo.

Kornilova v. Ukraine: Niadtong Marso 7, 2013, sa lungsod sa Nosivka, si Sister Kornilova ug Sister Serdiuk nanagtag ug imbitasyon sa ilang mga silingan alang sa Memoryal sa kamatayon sa Kristo. Usa ka lalaki ang namalikas ug nanginsulto nila. Dayon iyang giatake sila ug gisumbag ug kusog ang nawong ni Sister Kornilova maong grabe siyang naangol. Naospital siyag 11 ka adlaw. Wala ilha sa mga polis nga ang maong pag-atake maoy tungod sa relihiyon, ug miingon sila nga ang atong sister biktima lang sa “personal nga kalagot.” Gipamulta lang sa korte ug gamayng kantidad ang maong lalaki.

Ang mga representante sa sangang buhatan sa Ukraine kadaghang nakigmiting uban sa lokal, nasyonal, ug internasyonal nga mga opisyales aron hisgotan ang maong mga paglutos. Human masulayi ang tanang paagi aron maremedyohan ang situwasyon, ang mga brader nagpayl nag mga kaso sa ECHR niadtong 2014. Makapainteres nga usa ka tuig una pa niana, gisugdan na sa mga opisyales ang pagdokumento sa mga krimen nga gihimo tungod sa relihiyon didto sa Ukraine. Ang 2013 nga report sa Ukrainian nga Ombudsman nag-ingon: “Kay walay gihimong aksiyon ang mga polis aron imbestigahan ang mga krimen nga posibleng gihimo tungod sa pagdumot sa relihiyon, ang mga kriminal mibati nga puwede ra nilang ipadayon ang ilang gihimo.” Dugang pa, sa 2013 nga report bahin sa Ukraine, ang United Nations Human Rights Committee miingon nga nabalaka sila kay ang mga krimen tungod sa pagdumot, apil na ang gihimo batok sa mga Saksi ni Jehova, giisip lang sa Ukraine ingong dili bug-at nga mga kaso. Ang Committee mihinapos nga ang gobyerno sa Ukraine kinahanglang “mohimog dugang nga mga paningkamot aron maseguro nga maimbestigahan pag-ayo ang mga sumbong bahin sa krimen tungod sa pagdumot, ug nga kadtong naghimo niana moatubang sa korte . . . ug, kon sila mahukmang sad-an, kinahanglang pahamtangan silag nahiangayng silot, ug ang mga biktima bayran ug saktong danyos.”

Sa di pa dugayng katuigan, ang gobyerno sa Ukraine mihimo nag mga aksiyon bahin niini. Bisan pag ang mga Saksi ni Jehova sa maong nasod dunay kagawasan sa pagsimba, hinaot kining tulo ka desisyon nga gipakanaog sa ECHR mopalihok sa mga awtoridad sa Ukraine ug sa ubang nasod nga panalipdan ang kagawasan sa pagsimba sa atong mga igsoon. Naghinamhinam ta sa panahon dihang si Jehova, ang Diyos sa hustisya, magtapos sa tanang paglutos batok niadtong nagasimba kaniya.​—Deuteronomio 32:4.