Niadtong Disyembre 17, 2020, ang European Court of Human Rights (ECHR) nagpakanaog ug desisyon sa kasong Tretiak v. Ukraine pabor kang Brader Oleksandr Tretiak. Si Brader Tretiak grabeng gikulata sa tulo ka tawo niadtong Nobyembre 26, 2013, samtang nagpauli sa iyang balay gikan sa pagsangyaw. Ang ECHR miingon nga ang mga awtoridad sa Ukraine wala mohimo sa nahiangayng imbestigasyon sa maong krimen. Ang Korte midesisyon nga hatagan ug danyos nga 7,500 euros ($9,100 U.S.) ang biktima.

Grabe kaayo ang pagkulata kang Brader Tretiak maong halos usa ka bulan siyang naospital. Tulo pa ka bulan ang milabay human sa pag-atake ayha giinspeksiyon sa mga polis ang dapit diin nahitabo ang krimen. Wala sab nila ilha nga gikulata si Brader Tretiak tungod sa iyang relihiyon, ug para nila dili ra grabe ang kadaot nga naagoman ni Brader Tretiak. Sa ulahi, ang maong sumbong gibutang lang sa mga polis sa kategoriyang minor crime. Dugang pa, sa tulo nga nagkulata usa lang ang ilang giakusahan—pero gihimo lang nila kini human nga ang maong tawo nakaikyas na sa nasod. Ang laing duha nga nagkulata, nga naglakip sa usa ka opisyales sa kapolisan, giisip nga mga testigo ra sa krimen. Wala gyoy bisan usa nga nasilotan. Kini ug ang ubang klarong inhustisya nagpalihok kang Brader Tretiak sa pagsang-at ug kaso sa ECHR niadtong 2015.

Sa desisyon niini, ang ECHR mihinapos nga “ang mga awtoridad [sa Ukraine] napakyas sa paghimog nahiangayng imbestigasyon sa pagmaltratar nga naagoman sa nagsang-at sa kaso,” nga maoy paglapas sa European Convention on Human Rights.

Hinaot nga ang maong desisyon makatabang aron mapanalipdan ang katungod sa pagsimba sa atong mga igsoon sa Ukraine ug sa ubang nasod. Labaw sa tanan, mapasalamaton ta kang Jehova, nga naghatag natog hustisya.—Lamentaciones 3:59.