Niadtong Pebrero 24, 2022 sa buntag, nakamata ko tungod sa kusog nga mga pagbuto. Abi nako tog dalugdog lang kay nag-ulan, pero ang tinuod mga bomba na diay to.

Mao nga nakita nako nga kinahanglan na nakong mobiya sa among balay, nga naa sa sentro sa siyudad sa Mariupol. Pagkasunod adlaw, miadto ko sa balay sa akong lola nga si Iryna nga layo na sa siyudad. Dayon ang akong mama nga si Kateryna miapas pod namo sa akong lola ug ig-agaw. Adtong una, mibati pa ming luwas sa balay ni Lola, pero sa basement mi nangatulog sa pipila ka adlaw.

Dihay kas-a nga nahulogag bomba ang among garden samtang naa mi sa basement. Makabungog ang kakusog sa pagbuto. Grabe nakong ampo kang Jehova adtong higayona. Paglabayg usa ka semana, mibati mi nga delikado na sa balay ni Lola, maong nakadesisyon ming mobalik sa siyudad aron mangitag paagi nga maka-evacuate mi. Nag-ampo ko kang Jehova nga iya ming proteksiyonan ug tabangan nga makahawa adtong lugara.

Buntag sa Marso 4, wala gyoy tren sa Mariupol kay gilikosan na ang siyudad. Mao nga midangop mi sa usa ka theater sa siyudad nga daghan kaayog tawo. Nagpabilin mig 10 ka adlaw didto. Sa kadaghan sa tawo, sa salog na mi nangatulog. Hugaw kaayo ang lugar, ug lisod kaayong makakuhag pagkaon ug ininit tubig. Kinahanglan pa ming molinyag pila ka oras.

Usa ka adlaw, dihay bomba nga mibuto di ra layo sa theater. Sa kakusog sa bomba, nangabuak ang mga bentana, ug tungod adto misulod ang bugnaw kaayong hangin.

Unsay nakatabang nako niining lisod kaayong panahon? Nakatabang nako ang asoy sa basahon sa Job. Dihang makakita ko nga mag-panic ang mga tawo tungod sa mga pagbuto, basahon nako ang asoy sa Job diha sa akong Bibliya. Nakapakalma to nako. Ma-imagine nako nga naglingkod ko tapad kang Job sa theater, ug giingnan nako siya: “Nasabtan na gyod nako imong gibati.” Halos tanan nawala kang Job: iyang pamilya, maayong panglawas, ug mga kabtangan. Materyal nga mga butang lang ang nawala nako. Kauban ra nako ang akong pamilya, buhi ming tanan ug maayo rag panglawas. Niadtong taknaa, naamgohan nako nga dili ra gyod diay ingon ana ka grabe akong kahimtang. Tungod adto, migaan akong pamati.

Pagka-Marso 14, nakabalita mi nga dihay grupo nga nakabiya sa siyudad. Busa, midesisyon mi nga mobiya pod. Kami ug ang ubang kauban namo sa theater nakakitag kasakyan.

Bayente ka sakyanan ming nag-convoy nga mibiya sa siyudad. Sa usa ka cargo van, naghuot ming 14 ka pasahero. Samtang nagbiyahe mi, dihay nangahulog nga bomba sa palibot. Padayon kong nag-ampo adto. Dihang nakagawas mi sa Mariupol, mihunong ang drayber, dayon nanaog siya ug mihilak. Nalikayan niya ang tanang land mine nga nagkatag sa karsada. Nabalitaan pod namo nga duha ka adlaw lang human mi makabiya, gibombahan ang theater ug labing menos 300 ang namatay.

Human sa 13 ka oras nga biyahe, nakaabot mi sa Zaporizhia. Pagkaugma, misakay mig tren paingon sa Lviv. Adtong higayona, 16 mi ka pasahero sa bagon sa tren nga sagad upat ka tawo lang ang sakay. Init kaayo. Nagtindog ra ko sa tunga sa tren sa tibuok biyahe aron makahanggab ug preskong hangin. Miabot mi sa Lviv pagka-Marso 16. Ug giabiabi mi pag-ayo sa atong minahal nga mga igsoon. Miestar mi sa Kingdom Hall sulod sa upat ka adlaw. Nakahilak gyod ko sa pagmahal ug pag-atiman kanamo sa mga igsoon. Regalo gyod to ni Jehova.

Pagka-Marso 19, nakadesisyon mi sa akong lola, mama, ug ig-agaw nga mobiya sa Ukraine ug moadto sa Poland. Didto, giabiabi na pod mi sa mga igsoon. Gitagan-an mi nila sa tanan namong panginahanglan. Nakita namo nga gimahal gyod mi nila.

Desinuybe anyos pa lang ko, pero human ko makasinati adto nga mga kalisdanan, akong nakita kon unsa ka importante nga palig-onon ang atong pagtuo samtang okey pa ang kahimtang. Makatabang nimo ang pagtuo aron makalahutay ka. Maayo na lang gyod nga duna koy personal study sa wala pa ang gubat, kay kon wala pa, puwerte gyod untang lisora.

Mapinanggaon kaayo nga Amahan si Jehova. Sa tanang higayon niadtong panahona, gibati nako nga morag gihawiran niya ang akong tuong kamot ug iya kong gigiyahan. Dako kaayo nakong pasalamat kang Jehova sa tanan niyang gihimo para nako.—Isaias 41:10.