Samtang nagkagrabe ang giyera sa Donetsk Region sa Ukraine, si Brader Mykola Bozhedomov balikbalik nga miadto sa Kramatorsk aron daghan ang iyang matabangan nga makaikyas sa giyera didto.

Pero, niadtong Abril 8, 2022, si Mykola namatay dihang gibombahan ang estasyon sa tren sa Kramatorsk, Donetsk Region.

Gawas kang Mykola, nga 58 anyos, usa pa ka sister ang apil sa kapig 50 nga namatay. Dugang pa, usa ka brader ang apil sa kapig 100 ka tawo nga nasamdan. Ang ubang Saksi nga naka-survive sa pag-atake miingon nga dihay duha ka makabungog nga pagbuto nga gisundan ug nanglupad nga mga piraso sa metal.

Si Nina, nga asawa ni Mykola sa 32 na ka tuig, miingon: “Kanunay gyong giuna sa akong bana ang kaayohan sa uban. Gusto gyod niyang tabangan ang edaran ug nasakit nga mga magmamantala. Pero matag higayon nga mobalik siya sa Kramatorsk, nagkagrabe ang kahimtang. Kataposan na unta to niya nga pagbalik didto.”

Ang magtiayon dungang nabawtismohan niadtong 1997. Si Mykola nag-alagad ingong matinumanong ansiyano sulod sa daghang tuig. Ang mga igsoon miunong gyod kang Nina aron ipakita ang ilang gugma ug suporta. Siya miingon, “Ang ilang paghupay nakatabang nako niining lisod nga panahon.”

Si Nina miingon pod nga nahupayan siya sa Bibliya, ilabina sa Isaias 40:28-31. “Gitabangan ko ni Jehova nga maulian ang akong kusog,” miingon si Nina. “Gibati nako nga gihigugma gyod ko pag-ayo ni Jehova. Sa una, mabasa lang nako ni sa atong mga publikasyon, pero karon personal na gyod nako ning naeksperyensiyahan.”

Padayon natong giampo si Nina ug ang tanan nga namatyag minahal sa kinabuhi tungod sa gubat. Nahibalo ta nga padayon silang palig-onon ni Jehova.—Salmo 20:2.