Sa tibuok Ukraine, ang pagbalik sa publikong pagsangyaw nakahatag ug kalipay ug naay maayong mga resulta. Ang mga tigdumala sa sirkito ug lokal nga mga ansiyano nagreport nga daghan ang nalipay nga nakakita sa atong mga literature cart ug miingon pa gani nga gimingaw silang makita ang mga Saksi ni Jehova.

Si Tatiana gikan sa Serhiivka Congregation sa Odesa Region midesisyon nga bisitahon kadtong iyang mga nasangyawan sa wala pa ang pandemic. Siya miingon, “Sa sugod pa lang, nakita nako nga gipanalanginan ni Jehova ang among paningkamot sa pagbalik sa publikong pagsangyaw.” Dihay higayon nga gibisita niya ang babaye nga mibalibad ug Bible study sa wala pa ang pandemic. Niining higayona, ang babaye ganahan nang makighisgot sa espirituwal ug gusto nang magpa-Bible study. Si Tatiana midugang, “Kinahanglan nakong bisitahon ang tanan nakong balikduaw sa una ug tanyagan silag Bible study!”

Si Yevheniy ug Lilia maoy mga publisher nga taga-Mariupol. Mibiya sila sa ilang balay ug nagpuyo na karon sa mas luwas nga lugar sa Ukraine. Silang duha regular nga nagsangyaw. Miingon sila nga ang ministeryo nakatabang nila nga dili magsigeg hunahuna sa ilang mga problema. Sila miingon: “Kabalo mi nga mausab na gyod ang among kinabuhi. Lisod kaayo ang pagsugod ug bag-ong kinabuhi, pero kabalo mi nga dili mubo ang kamot ni Jehova. Naa ang iyang balaang espiritu, ug ang mga igsoon andam nga motabang aron makasugod mig bag-ong kinabuhi sa bag-ong lugar.”

Sa ubang lugar sa nasod, ang mga igsoon nakahatag pod ug pamatuod pinaagi sa ilang maayong mga buhat. Pananglitan, usa ka grupo sa mga brader sa siyudad sa Mykolaiv mitabang sa usa ka international humanitarian relief organization sa pag-ayo ug paghikay ug warehouse nga gamiton sa pagpanghatag ug hinabang. Giayo sa mga brader ang water system, nag-andam silag mga shelf, ug mitabang sa pagbahinbahin sa daghan kaayong hinabang. Dihang giinspeksiyon sa usa ka representante sa humanitarian organization ang ilang nahimo, nakahilak siya. Siya miingon, “Wala ko magdahom sa maong maayong mga resulta.”

Bisag ang mga igsoon sa Ukraine nakasinatig lisod nga mga kahimtang, gibati nila ang kalipay nga resulta sa pagpabiling aktibo sa ministeryo ug sa “pagbuhat ug maayo.”—Galacia 6:9.

Niadtong Hulyo 13, 2022, ang mosunod mao na ang total nga report gikan sa Ukraine. Kini gibase sa kompirmadong mga report gikan sa lokal nga mga igsoon. Pero lagmit mas taas pa ang aktuwal nga gidaghanon, kay lisod ang komunikasyon sa tanang rehiyon sa nasod.

• 42 ka publisher ang namatay

• 97 ka publisher ang na-injured

• 28,683 ka publisher ang mibiya sa ilang balay

• 524 ka balay ang di na kapuy-an

• 588 ka balay ang dunay major damage

• 1,554 ka balay ang dunay minor damage

• 5 ka Kingdom Hall ang di na magamit

• 10 ka Kingdom Hall ang dunay major damage

• 36 ka Kingdom Hall ang dunay minor damage

• 27 ka Disaster Relief Committee (DRC) ang naglihok karon sa Ukraine

• 52,947 ka indibiduwal ang gitabangan sa DRC nga makakitag mas luwas nga kapuy-an

• 23,863 ka publisher ang mibakwet ngadto sa laing nasod ug gitabangan sa mga igsoon sa pagtuo