Sukad niadtong Disyembre 26, 2022, ang mga regular ug espesyal payunir sa Ukraine nakatambong sa Pioneer Service School sa mga lugar diin luwas kining himoon. Depende sa kahimtang sa ilang lugar, ang mga payunir nagtambong in person o pinaagig Zoom. Bisan pa sa mga kalisdanan, sama sa pagpamomba, pagkawala sa koryente, kalisod sa kinabuhi, ug putolputol nga Internet, gihimong prayoridad sa atong mga igsoon ang pagdawat niining espesyal nga instruksiyon. Kini miresultag daghan kaayong espirituwal nga panalangin.

Si Natalia nga taga-Kryvyi Rih miingon: “Ang tunghaan nahimong samag salbabida para nako. Nakatabang ni nako nga dili malumsan sa akong mga kabalaka ug kahadlok.” Si Anastasia nga taga-Chernivtsi miingon pod: “Ang tunghaan nagkombinsir nako nga gimahal gyod ko ni Jehova. Daghan kaayog nahitabong dili maayo sa miaging tuig, maong gikinahanglan gyod nako ang tunghaan. Determinado kong himoon ang tanan aron padayong mabatonan ang panalangin ni Jehova.”

Si Svitlana, payunir nga taga-Kitsman, nabalaka dihang nakadawat siyag imbitasyon sa pagtambong sa tunghaan. Siya miingon: “Giampo nako kang Jehova ang akong mga kabalaka, apil ang kalisod sa kinabuhi. Misalig ko niya ug wala gyod ko magmahay. Gibati nako ang gugma ug pag-atiman ni Jehova.” Ang bana ni Svitlana, nga dili Saksi ni Jehova, nadasig sa iyang mga paningkamot. Ug tungod ana, mikuyog na siya kang Svitlana sa pagtambong ug mga tigom sa kongregasyon.

Sa duha ka higayon, ang mga estudyante sa Zhytomyr kinahanglang mobalhin sa underground shelter tungod sa mga warning sa pagpamomba. Gipadayon nila ang klase gamit ang lutoanan nga sugnorag kahoy ingong heater. Bisan pa niini nga mga kalisdanan, si Valentyna, nga di pa dugayng mibalhin sa Zhytomyr, miingon: “Di gyod nako malimtan ni nga klase. Gibati nako nga naa ko ilalom sa gamhanang mga pako ni Jehova.”

Sama sa daghang nasod, ang mga payunir sa Ukraine nalipay pag-ayo pagkahibalo nila nga gipaubsan ang kab-otonong oras sa mga payunir. Human madungog ang pahibalo, si Yulia miingon: “Ang akong kasingkasing napunog gugma para kang Jehova. Ganinang buntag, nag-ampo ko kang Jehova ug mihangyo ko niya nga tugotan ko niyang magpabiling payunir. Wa ko kabalo kon unsaon ni niya pagtubag, pero kabalo kong iya ning tubagon. Pagkahibalo nako nga gipaubsan ang kab-otonon nga oras, dako gyod kaayo ang akong pasalamat kang Jehova sa iyang gihimo para nako. Kini nga balita nahisamag lami kaayo nga dessert pagkahuman sa klase.”

Niadtong Enero 24, 2023, ang mosunod mao na ang total nga report gikan sa Ukraine. Kini gibase sa kompirmadong mga report gikan sa lokal nga mga igsoon. Pero lagmit mas taas pa ang aktuwal nga gidaghanon, kay lisod ang komunikasyon sa tanang rehiyon sa nasod.

• 47 ka publisher ang namatay

• 97 ka publisher ang na-injured

• 8,953 ka publisher ang mibiya sa ilang balay

• 590 ka balay ang di na kapuy-an

• 645 ka balay ang dunay major damage

• 1,722 ka balay ang dunay minor damage

• 8 ka Kingdom Hall ang di na magamit

• 17 ka Kingdom Hall ang dunay major damage

• 76 ka Kingdom Hall ang dunay minor damage

• 26 ka Disaster Relief Committee (DRC) ang naglihok karon sa Ukraine

• 46 ka balay ang na-repair na

• 5 ka Kingdom Hall ang na-repair na

• 54,445 ka indibiduwal ang gitabangan sa DRC nga makakitag mas luwas nga kapuy-an

• 27,655 ka publisher ang mibakwet ngadto sa laing nasod ug gitabangan sa mga igsoon